Lo frate ’nnamorato, libretto, Napoli, De Bejase, 1734

 ATTO PRIMMO
 
 SCENA PRIMMA
 
 Vannella scopanno nnante a lo portone de la casa soja e Cardella coglienno sciure da le tteste ncoppa a lo barcone de la casa soja
 
 VANNELLA
 
    Passa Ninno da cca rrente,
 e mme fa lo zinnariello.
 Forfantone, malezejuso,
 tu co mmico vuoje pazzeà.
 
 CARDELLA
 
5   Io, pe ddare le martiello,
 no mme voto a ttenì mente.
 Forfantone, malezejuso,
 io te voglio fa caneà.
 
 Che te pare? vao bona?
 VANNELLA
10Che? tu puro la saje sta canzona?
 CARDELLA
 Io puro; e mm’allecordo che na vota
 io la deceva, e nce abbuscaje da zia.
 VANNELLA
 Perché?
 CARDELLA
                  Ca sta canzona
 mpara de fa l’ammore.
 VANNELLA
                                             Arrasso sia!
15Affé no lo ssapea. Da mo nne nante
 no la derraggio cchiù.
 CARDELLA
                                          (Vedite cosa!
 Si manco fa l’ammore non sapesse).
 VANNELLA
 Comme dice Cardella?
 CARDELLA
 Niente, niente, Vannella. Accossì ppriesto
20te miette a ttravaglià?
 VANNELLA
                                           Scopo cca nnante.
 CARDELLA?
 Sì: perché abbesognante
 mo de sta mpolezìa.
 VANNELLA
 Vuoie dì?
 CARDELLA
                     Venne ll’autr’iere già lo figlio
 de lo segnore...
 VANNELLA
                              Ll’aggio ntiso dicere.
25E mme?
 CARDELLA
                   Mo se farranno
 sti matremmonie.
 VANNELLA
                                    (E llesto).
 CARDELLA
                                                        Stanno allegre
 mo ste romane, le ppatrune toje?
 VANNELLA
 Starranno allegre; e la patrona toja?
 CARDELLA
 Te lo ppuoje smacenare.
30Vì, ca se tratta de se mmaretare.
 VANNELLA
 Ora io, si è pe mme, non saparria
 sto mmaretà che d’è! T’aje da vedere
 sempre n’ommo vecino.
 CARDELLA
                                               E cche te mozzeca?
 VANNELLA
 Leva le, che breogna! Io morarria.
 CARDELLA
35Uh poverella (e ccridela) conforma
 dicemo tu, non te mmaretarraje.
 VANNELLA
 Io mmaretà? Sciù sciù! (che ffosse craje).
 CARDELLA
 Donca tu mo n’aje nullo nnammorato.
 VANNELLA
 Che? nnammorato? Guarda, satt’arrasso.
40(Nn’aggio quarcuno).
 CARDELLA
                                          Aje visto Sautanasso?
 Io nn’aggio ciento.
 VANNELLA
                                     Ora parlammo d’autro.
 Ha ditto lo segnore
 ca chisto, ch’è benuto,
 è n’ommo tanto alliegro!
 CARDELLA
                                               È miezzo lammia.
 VANNELLA
45Lo vorria vedè proprio.
 CARDELLA
                                             Oh justo justo,
 Veccolo lloco, e bene
 mmerannose a lo specchio.
 VANNELLA
                                                    Uh maramene!
 CARDELLA
 Non te partì, ca nce avarraje gran gusto.
 
 SCENA II
 
 Don Pietro co no specchio mmano mmirannose e le ddette
 
 DON PIETRO
 
    Pupillette, fiammette d’amore,
50per voi il core struggendo si va.
 Llarallà, llarallà, llarallera
 llarallerà, lallera, llallà. (Abballa)
 
 VANNELLA
 (È ccuriuso sa).
 DON PIETRO
                                Stongo de genio
 stammatina frizzante e speretuso;
55po fora de lo ssoleto
 sto bello de visage e scannaluso:
 nche mme vede la sposa
 chiava de facce nterra e more cessa.
 VANNELLA
 (Nfunno de maro).
 CARDELLA
                                      (Cierto viat’essa!)
 DON PIETRO
60Adorati balconi, e quando, e quando
 da voi spunta quel sol che mi ricrea? (Vierzo la casa de Nena)
 Ma che miro? chi è ella? è ninfa o dea? (Addonannose de Vannella)
 VANNELLA
 (Uh uh!)
 CARDELLA
                    (Mo è bella).
 DON PIETRO
                                              Non risponde? è mutola?
 CARDELLA
 Si Don Pietro, scosatela: ca chessa
65è scornosa co ll’uommene.
 DON PIETRO
                                                  Oh, cca staje?
 E chi è cotesta ragazza scornosa?
 CARDELLA
 Chesta cca è la creata de la sposa.
 DON PIETRO
 Canchero adesso! De la sposa? Adunque
 qual serva del mio bene
70abbraccio a tte pe essa...
 VANNELLA
                                               Ah negra mene! (Fuje da ll’autra parte)
 DON PIETRO
 Che canchero aje?
 CARDELLA
                                    Ah, ah, chesta è da ridere.
 Ma io nce voglio scennere. (Trase)
 VANNELLA
                                                   (È mmanisco).
 DON PIETRO
 Venga...
 VANNELLA
                  (Sì llesto).
 DON PIETRO
                                       Venga qua, cor mio.
 Non se vo incomodar? Mme ncommedo io. (Va vierzo Vannella)
 VANNELLA
75(Ah n’abburla). (E fuje da ll’autra parte)
 DON PIETRO
                                 O mmalora! Nuje facimmo
 a comma damme la setella. E via.
 VANNELLA
 (Io mme ne sagliarria;
 ma nce aggio gusto a ppazzeà).
 DON PIETRO
                                                          Se faccia
 capace: ca nuje autre nzorature,
80quanno se tratta d’abbraccià, abbracciammo
 todos, porzì le gatte de la casa.
 VANNELLA
 Le ggatte? che ddecite? e ssi ve scippano?
 DON PIETRO
 Nce facimmo scippà. Su lei mi scippi.
 CARDELLA (ch’è scesa)
 Sì scippalo, Vannella.
 VANNELLA
85Ah le, comme si bella!
 Che ffosse gatta io fuorze?
 DON PIETRO
                                                  (Sta fegliola,
 o è tanto locca, o è ttanto marejola).
 
 SCENA III
 
 Carlo e li stisse
 
 CARLO
 Al suo signor Don Pietro
 un servo obbligatissimo ha l’onore
90d’inchinarsi umilmente.
 DON PIETRO
 Riverito parente,
 ge sui votr serviteur.
 CARLO
                                         Anzi padrone.
 DON PIETRO
 Eh burla.
 CARLO
                     Dissi poco: padronissimo.
 DON PIETRO
 Eh burla.
 CARLO
                     Non mi crede?
 DON PIETRO
                                                  Eh burla.
 CARLO
                                                                      O Dio!
95Fa grave ingiuria al mio
 rispetto ossequiosissimo,
 che protesto per lei...
 DON PIETRO
                                         Or via, vi creggio.
 CARLO
 E protesterò in ogni congiuntura...
 DON PIETRO
 Vi creggio.
 CARLO
                       In ogni tempo...
 DON PIETRO
100Vi creggio.
 CARLO
                       In ogni loco...
 DON PIETRO
 (O benaggia oje).
 CARLO
                                   Costantissimamente.
 DON PIETRO
 (Ahu, benaggia craje).
 CARDELLA
                                            (Va tiene, quanno
 sto romano se mette ncompremiente).
 DON PIETRO
 L’è un po’ seccante. (A Vannella)
 VANNELLA
                                       È cceremonejuso.
 DON PIETRO
105(Ceremoneosissemo). E accossì?
 CARLO
 Si divertisce qui con le ragazze.
 DON PIETRO
 Veda... sto qui aspettanno che s’affaccia...
 CARLO
 Forse la mia nipote?
 DON PIETRO
                                        Ah! Lei lo disse:
 l’idolo mio.
 CARLO
                        Ed ella il sa?
 DON PIETRO
                                                 Nix sape.
 CARLO
110Vannella, avvisa Nena che si faccia
 presto in balcon.
 CARDELLA
                                 Va porta ssa mmasciata.
 VANNELLA
 Io servo a lo segnore. (Trase)
 DON PIETRO
                                          È na mmasciata
 co la lecienzea de lo sopreore.
 Portane n’autra tu. Dì alla sorella,
115che s’affacce essa puro.
 CARDELLA
                                             (Vi che lloteno!)
 DON PIETRO
 Ca nc’è il suo vago qua.
 CARLO
                                             Anzi il suo servo.
 La ringrazio...
 DON PIETRO
                             Mo jammo para patte.
 CARDELLA
 Nzomma vuje ve grattate nfra vuje stisse
 a ffa ssi matremmonie,
120e ppe Cardella non se penza a nniente.
 DON PIETRO
 Tu puro te resiente?
 CARLO
                                        Oh v’è pur tempo.
 CARDELLA
 V’è pur tempo! Decite buono vuje.
 DON PIETRO
 Penzarrà po lo gnore.
 CARDELLA
                                         Sì lo gnore;
 nce avite da penzare tutte duje.
 
125   No mme vedite ne,
 ca ggià so ffatta grossa,
 ca so ccresciuta già?
 Ve parlo chiatto e ttunno,
 e no mme faccio rossa:
130me voglio mmaretà.
 
    Mo, che lo tiempo nn’è,
 voglio gaudè a sto munno:
 ca, si aggio mo lo bene,
 po passa e cchiù non vene;
135e mme pozza accojetà.
 
 SCENA IV
 
 Don Pietro e Carlo
 
 DON PIETRO
 Che ve ne par di questa
 nostra servetta?
 CARLO
                                È molto spiritosa.
 La nostra...
 DON PIETRO
                        Oh quella è alquanto sghizzignosa.
 E accossì... donné moé tabacco. (Se metteno a ppasseà)
 CARLO
140Si serva.
 DON PIETRO
                   A tte! Se ne jarranno nnestrece
 ste fegliole nvederence.
 CARLO
                                             Se ne amano,
 vederne avranno caro.
 DON PIETRO
                                           Vi, ca nuje
 simmo duje belle giuvene.
 CARLO
 Eh bello siete voi: io questo titolo
145non pretendo, né merito;
 è questo un vostro pregio insuperabile...
 DON PIETRO
 Parè, parente, fora cerimonie.
 CARLO
 Ma se...
 DON PIETRO
                  Sarraggio io bello
 nzoperlativo grado, per esempio;
150ma lei è bello ancor.
 CARLO
                                       Grazie infinite.
 DON PIETRO
 Dir il contrario a lei sarebbe un smacco.
 E accossì... donné moé tabacco.
 CARLO
 Le piace?
 DON PIETRO
                     Mi gusteggia.
 CARLO
 Lo comanda?
 DON PIETRO
155Obligé.
 CARLO
                 Noi farem le nozze adunque
 in breve, e tutte a un tempo.
 DON PIETRO
                                                      Sì signore:
 le mie, le vostre e chelle de lo gnore.
 
 SCENA V
 
 Vannella e Cardella a li barcune, e li ditte
 
 VANNELLA
 Sì Don Pietro, ve dice la sia Nena,
 che uscia la compiatesca: perché mmo
160affaccià non se po.
 CARDELLA
 Sio Carlo, manna a ddì la sia Luggrezia,
 che la scosate: perché mo ha da fa,
 e non se po affaccià.
 DON PIETRO
 E bon prode nci faccia e sanità.
165Vanno nconzierto.
 CARLO
                                    Or vedi congiunture!
 VANNELLA
 Ve vedite oje.
 CARDELLA
                            Oje po ve vedite.
 A DUE
 (E cconzolate tutte duje starrite). (Traseno)
 DON PIETRO
 Io corrivo nce so poter di Bacco!
 CARLO
 Che ve ne par?
 DON PIETRO
                               Donné moé tabacco.
170Spassamonce li frate.
 CARLO
                                          Che s’ha a fare?
 Bisogna compatire
 le donne, poverette: spesso stanno
 con gli affari di casa.
 DON PIETRO
                                        Ma noi altri
 nnammorati focosi, si n’avimmo
175le nnammorate pronte,
 per un bondì facciamo tutto a monte.
 CARLO
 Ah! Non son questi sensi
 degni di sua bontà...
 DON PIETRO
                                        Lei dica a Nena...
 CARLO
  Che mai?
 DON PIETRO
                      Lasciate un poco che ci pensi.
 
180   Le dirà:
 che il suo vago cicisbeo
 stava qua,
 caldo caldo infervorato,
 per poterla vagheggiar;
185poi restato
 freddo freddo qual chiafeo;
 infadato andò a malor.
 
    Ma non tema: che fedele
 io saprò qui ritornar;
190passarà l’infadamento,
 perché al fine io non ho fele;
 tenerello, come unguento,
 tutto affetto è questo cor.
 
 SCENA VI
 
 Carlo
 
 CARLO
 È d’un umor costui molto festoso;
195e credo ben, che Nena
 più che paga sarà d’averlo in sposo. (E s’abbìa; po vedenno ch’esce Nina, se ferma)
 
 SCENA VII
 
 Nina da la casa e Carlo
 
 NINA
 Partì quello smorfioso. Esci, sorella... (Parla dinto)
 CARLO
 Nina.
 NINA
              Oh qui siete? Gir vogliam con Nena...
 CARLO
 Oh ben! Vedete il zio, né vi degnate
200fargli una riverenza?
 NINA
 Scusi... la confidenza...
 CARLO
 L’inciviltà vuoi dir.
 NINA
                                      Non vi turbate:
 ne farò due in pena. Ecco. (Fa doje reverenze)
 CARLO
                                                   Che pazza!
 NINA
 (Con queste cerimonie egli ne ammazza).
 CARLO
205Ove gir si volea?
 NINA
                                 Qui presso, in casa
 della nostra comare.
 CARLO
                                        E sole?
 NINA
                                                        In villa
 qui siam; poi son due passi.
 
 SCENA VIII
 
 Nena da la casa e li stisse
 
 NENA
                                                      Eccomi, Nina.
 NINA
 (Eh? Riverenze al zio). (Sotto voce a Nena)
 NENA
 Vi riverisco. (A Carlo)
 CARLO
                           E ben mia signorina,
210ove apprendesti ad esser malcreata?
 NINA
 Io fei la riverenza.
 CARLO
                                    Eh sì. Vannella
 non ti fé l’imbasciata?
 NENA
                                           Sì: che vi era...
 CARLO
 V’era il signor Don Pietro.
 NENA
                                                  Bene.
 CARLO
                                                               E come
 non ti festi in balcon?
 NINA
                                          Stava occupata...
 CARLO
215In rassettarsi per uscir di casa?
 Grande occupazion! Frattanto in colera
 partì quel galantuomo.
 NINA
                                            E perché in colera?
 NENA
 (Piacesse al ciel).
 NINA
                                  Mancherà tempo...
 NENA
                                                                      Appunto.
 CARLO
 Voi, che le cerimonie non capite,
220con questo ve ne uscite. Or tu farai
 quando ei torna le scuse,
 e a doppio complirai.
 NENA
 Come vuol. (Starà fresco).
 NINA
                                                  (Che seccagine!)
 CARLO
 Intanto ritiratevi: di casa
225troppo uscir non conviene or, che si denno
 effettuar le nozze.
 NINA
                                   E si faranno?
 CARLO
 Qual dubio? A me promessa
 Ha il signor Marcaniello
 la sua figlia in isposa; io son in obligo
230far che tu impalmi lui.
 NINA
                                            (Un vecchio rancido).
 CARLO
 Già il sai, Nina.
 NINA
                                Lo so.
 CARLO
                                             E che tu impalmi
 il suo figlio Don Pietro.
 NENA
                                             (Un uom ridicolo).
 CARLO
 Gia il sai, Nena.
 NENA
                                Lo so.
 CARLO
                                             Non si aspettava,
 secondo il concertato,
235che da Roma Don Pietro, onde chiamato
 fu dal padre a tal fine.
 NINA
                                           Egli è pur giunto.
 NENA
 Dunque altro non riman.
 CARLO
                                                Vicino è il punto
 della nostra comun felice sorte.
 NENA
 (Pria m’uccido da me).
 NINA
                                             (Pria son di morte).
 CARLO
 
240   Avventurose spose,
 goderne al fin conviene
 a i cari sposi accanto;
 col mio desiato bene
 contento anch’io sarò.
 
245   E giunse quel momento,
 che, sospirato tanto,
 mi fu di pena e stento;
 io più bramar non so.
 
 SCENA IX
 
 Nena e Nina
 
 NENA
 Di contenti si cari
250con lei, Nina, mi allegro.
 NINA
 Godo, Nena con lei
 d’allegrezze si belle.
 NENA
 Sposa, vi riverisco.
 NINA
 Vi riverisco, sposa.
 NENA
                                     Ah cieli!
 NINA
                                                       Ah stelle!
 NENA
255E ’l zio, per sodisfare a i desir suoi,
 poco cura di noi, del nostro danno?
 NINA
 Qual destino tiranno
 volle che il genitor tolto da morte
 si per tempo ne fusse?
 NENA
                                            E qual rea sorte
260del perduto germano
 non fe averne più nuova?
 NINA
                                                 A un zio crudele
 non saremmo or soggette.
 NENA
                                                  Or che faremo?
 NINA
 Al fin si vaghi sposi impalmeremo.
 NENA
 Pria mi fulmini il ciel.
 NINA
                                           Ma tu raggione
265di lagnarti non hai.
 NENA
                                      Perché?
 NINA
                                                       Il tuo sposo
 giovane al fin sarebbe; io, io meschina
 con un vecchio miei dì pianger dovrei.
 Non è forse così?
 NENA
                                  Tu burli, Nina.
 NINA
 Da senno ti parl’io: di lui potresti
270esser contenta.
 NENA
                              Eh taci, o parla d’altro.
 NINA
 (Non le piace il mio dir: per quell’oggetto,
 che m’innamora, ella ha piagato il petto).
 NENA
 (Suo dire accorto, e scaltro
 intendo io ben: per quella fiamma istessa
275onde acceso è il mio cor, si strugge anch’essa).
 NINA
 Dunque del mio consiglio
 avvaler non ti vuoi? Così tua pace
 avresti, o Nena.
 NENA
                                Io pace tal non curo.
 NINA
 E ti contenti, oh Dio!...
 NENA
280Nina, pensa al tuo mal: ch’io penso al mio.
 NINA
 
    Tu non curi i detti miei,
 ben lo vedo, e so perché.
 D’altro oggetto amante sei;
 ma, se a te nemico è il fato,
285non ti giova il contrastar.
 
    Il tuo cuore innamorato
 si consuma, e so per chi.
 Ma, se paga esser non puoi,
 che far vuoi?
290Lascia, o misera, d’amar.
 
 SCENA X
 
 Nena
 
 NENA
 Chiaro pur favellommi; e ancorché in cifre,
 del caro Ascanio, per cui l’alma ho accesa,
 l’amor mi rinfacciò. Vuol, ch’io non l’ami,
 e me’l consiglia, e mostra
295pietade del mio male;
 ma il tutto ad arte infinge: ella è rivale.
 Ahi! Chi sa, che col zio
 non si adopri a mio danno?
 Mancava alle mie pene or questo affanno.
300Ma al fin che mai sarà? Con arte ancora
 saprò deludere l’arte sua. Mi preme
 sol, che del caro bene
 io non so, che promettermi: al mio foco
 par che avvampi ad un tempo, e sia di gelo;
305e affermar non mi lice,
 s’esser debbo per lui lieta, o infelice.
 
   È strano il mio tormento,
 è nuovo il mio martire.
 No, che nol puoi soffrire,
310povero amante cor.
 
   E chi sì duro stento,
 chi ti dà tanti affanni?
 Oimè son due tiranni:
 la speme ed il timor.
 
 SCENA XI
 
 Luggrezia, Marcaniello e Ascanio da la casa
 
 LUGGREZIA
315Chisto sì ch’è ttormiento! E scumpe, gnore,
 scumpe, ch’è troppo. Vuoje fa proprio, ch’io
 dinto a no puzzo mm’aggia da jettare?
 Sto romano io non voglio.
 MARCANIELLO
                                                 Che te pare,
 ah? Provita d’Ascanio?
 ASCANIO
320E cche mme vo parè?
 MARCANIELLO
                                          Non fuje? No strille?
 Non te nfade? Aje ragione: non te pozzo
 arrevà, ca non pozzo troppo movere
 sti mmalora de piede.
 ASCANIO
                                           Che? V’è scesa
 sta notte la polagra?
 MARCANIELLO
325Che ppolagra tu n’autro! Ma siente (A Luggrezia)
 LUGGREZIA
 E buje mo...
 MARCANIELLO
                          Va a la forca...
 ASCANIO
                                                      Via, n’è nniente
 sio Marcaniè, no v’alterate: è ppeo
 co la polagra.
 MARCANIELLO
                           E ttorna co ssa cancara
 de polagra! E ddapò che ssia polagra,
330fuorz’è lo primmo ggiovene, che ppate
 de polagra?
 LUGGREZIA
                         Ma vuje non site giovene.
 MARCANIELLO
 Schiatta, so biecchio nterra, pelagruso,
 pecuso, catarruso; tengo tutto
 l’incorabbele ncuollo; e ppuro è bero,
335ca mm’aggio da nzorare,
 e ppegliareme Nina.
 LUGGREZIA
                                        Uscia se nzore,
 e sse la piglie.
 MARCANIELLO
                             E ffrateto
 se pegliarrà la sore.
 LUGGREZIA
                                      Co ssalute.
 ASCANIO
 (Ah ca ll’arma se sparte).
 MARCANIELLO
                                                E ttu, co cchesso...
 LUGGREZIA
340Io mme ne stongo senza mmaretareme.
 MARCANIELLO
 No: tu lo zio t’aje da ngaudeà.
 LUGGREZIA
 Perché?
 MARCANIELLO
                  Ca lo bosillo lloco sta.
 Si chillo n’ave a ttene, manco avimmo
 io e frateto chelle.
 LUGGREZIA
                                   Uh no nce fossemo
345ncoppa Capo de Monte maje venute.
 ASCANIO
 (Justo accossì).
 MARCANIELLO
                               Anze ora benedetta,
 che io mme reteraje a sto casino;
 benedetta porzì la malatia,
 che ffece venì a st’aria lo si Carlo
350co le nnepute...
 ASCANIO
                               (Co la morte mia).
 MARCANIELLO
 Miedeco beneditto,
 che st’aria ll’ordenaje; e benedetta
 chell’ora, ch’io... (ah ah! Che stellettata
 a sto pede mancino!) (Mosta de sentì dolore a lo pede)
 LUGGREZIA
                                          E ssa polagra
355no la benedecite?
 MARCANIELLO
                                   Ah screanzata...
 va Asca’... Uh uh bonora (tossa) dalle quatto...
 Uh uh... (tossa) quatto schiaffune.
 ASCANIO
                                                                Via ntennite,
 sia Luggrezia, a lo gnore. E buje scompite
 de pegliareve collera.
 MARCANIELLO
                                         Orsù Ascanio,
360penzace tu a ffarela chiegare
 a cchello, che bogl’io.
 LUGGREZIA
                                         (Nnanze li munte
 cammenarranno).
 MARCANIELLO
                                    A tte, comm’a no figlio,
 io do la potestà (ca comm’a ffiglio
 t’aggio a la casa mia
365da tantillo cresciuto).
 ASCANIO
                                         Io comm’a ppatre
 v’aggio stemato, e stimo.
 MARCANIELLO
                                                Si essa ncoccia,
 e ttu vatte da luongo.
 LUGGREZIA
 (Sempe che mme vatt’isso, non è nniente).
 ASCANIO
 No no: ca mutarrà de sentemiente.
 MARCANIELLO
370   Veda ossoria! Mm’aggio da perdere
 pe tte la sciorte d’avè sta fata;
 e io te voglio dà male juorno.
 O songo patre, o songo cuorno...
 (Uh uh lo pede! So gguaje affè!)
 
375   Nnanze a lo tiempo vuoje fa schiattareme
 ne verrutella, capo sbentata?
 Ma no la vince mme guarde a mme.
 
 SCENA XII
 
 Luggrezia e Ascanio
 
 LUGGREZIA
 Ascanio, che nne dice?
 ASCANIO
                                            Si obbrecata
 ad obbedì a lo patre.
 LUGGREZIA
                                        E mmaretareme
380co chi no mme pejace?
 ASCANIO
                                            Ma pacienzia.
 LUGGREZIA
 No, no lo boglio fare.
 Tu già aje la potestà, si mme vuò vattere,
 su vatte, eccome cca.
 ASCANIO
                                        Vuoje pazzeare.
 LUGGREZIA
 Vuoje pazzeare tu, core de cano:
385ca saje quanto pe tte st’arma se struje,
 e ppe ffarme schiattà, mm’uodie, e mme fuje.
 ASCANIO
 Luggrezia, t’aggio ditto ciento vote
 (mo te lo ttorno a ddì) che t’accojete:
 ch’io non faccio pe tte.
 LUGGREZIA
                                           Perché?
 ASCANIO
                                                            Te manca
390no giovene de garbo?
 Io so no poverommo asciato a ccaso
 mmiezo a na via da lo si Marcaniello:
 che non canosco patre, e mmanco mamma,
 chi so non faccio...
 LUGGREZIA
                                    Chesto non mm’è nnuovo,
395e ppuro t’ammo quanto a ll’arma mia.
 ASCANIO
 Ma che se deciarria? Nziemo co ttico
 mme so ccresciuto, e ppo mm’aggio da dare
 co ttico a ffa l’ammore?
 Farria tuorto a lo gnore.
 LUGGREZIA
400Oh a cchesso pienze?
 ASCANIO
                                         E ppo io, a ddiretella,
 non me voglio nzorare;
 te suppreco mperzò, lassame stare.
 LUGGREZIA
 Va va: ca vedo quanto si tteranno;
 e sso ste scuse toje chiene de nganno.
 
405   Morta tu mme vuoje vedere,
 core ngrato;
 Io, pe ffarete gaudere,
 morarraggio. Ma chi sa?
 
    Fuorze tu, che mmo ostenato,
410mme faje tanto desprezzare,
 mm’avarraje da deseare.
 Quarche ccosa po sarrà.
 
 SCENA XIII
 
 Ascanio
 
 ASCANIO
 Chesta pe mme se struje, piatà nne sento,
 né la pozzo ajutà. Ma li gguaje suoje
415affronte a li guaje mieje so rrose, e sciure.
 Che pena è cchella, o Dio!
 Che ppe Nina, e ppe Nena (ah chi lo ccrede?)
 sente sto core mio!
 Tanto ammo ll’una, quanto ll’autra, e ttanto
420da chesta amato so quanto da chella;
 né ssaccio addò spartireme,
 non saccio chi lassare,
 non saccio chi pigliare; e sto nfratanto
 pe ttutte doje mmiezo all’affanne. O sciorte!
425Pe ffarme ascì da stiento,
 remmedeà nce po schitto la morte.
 
    Ogne pena cchiù spiatata
 patarria
 st’arma affritta e annegrecata,
430si po avesse qua speranza
 de poterse conzolà.
 
    Ma ojemmè ca de conzuolo
 no nc’è lluoco, no nc’è bia,
 no nc’è mmuodo de sperà.
 
 SCENA XIV
 
 Vannella da la casa
 
 VANNELLA
435Uh bene mio! Ca pe sti matremmonie
 fanno comm’a ddemmonie le ppatrune!
 Non pozzo sentì cchiune.
 Vedesse chillo schirchio de Don Pietro,
 pe sta no poco allegra.
440A ddirela, mm’ha genio: e mme pare,
 ch’io puro nn’aggio a isso. Eh... si non fosse,
 ca mme sbregognarria,
 spassà me nce vorria no pocorillo.
 Ma non mancarrà mmuodo... uh veccotillo.
445Si no bello marito annommenava,
 mo mme sarria venuto.
 
 SCENA XV
 
 Don Pietro e Vannella
 
 DON PIETRO
                                              Io pensarrebbe,
 ca la signora mo starrebbe commeta;
 si no farrebbe loteno, e davvero
 Mme sagliarrebbe il cancaro... Oh adeòs
450tu che sfuje comm’anguilla. (Addonannose de Vanella)
 VANNELLA
 Serva d’ussignoria.
 DON PIETRO
                                      Dico: la sposa
 s’affaccia, o non s’affaccia?
 VANNELLA
                                                   (Uh si sapisse).
 S’affacciarrà.
 DON PIETRO
                           Ma diable!
 L’è troppo contignosa:
455mme pare justo la zita d’Ajerola;
 appena ajere nce parlaje no poco,
 e io sto che sghizzo fuoco.
 VANNELLA
                                                 Arrasso sia.
 Addò avite lo ffuoco?
 DON PIETRO
                                         Qui nel core.
 Te: tocca.
 VANNELLA
                     Ah le! Gnernone,
460io mme cocesse pone,
 e ffacesse la bua.
 DON PIETRO
                                  No, non cocesse:
 tocca.
 VANNELLA (Tocca mpietto)
              Cca no nc’è niente. Jate jate,
 vuje mme mbrogliate; e ggià ve site accuorto
 ch’io songo peccioncella.
 DON PIETRO
                                               Peccioncella?
465Ma saje lo cunto tujo?
 VANNELLA
                                           Gnoressì, vava
 li cunte mme contava; e mm’allecordo
 chillo dell’uorco, che ddecea accossì:
 Petrosenella mia, Petrosenella,
 cala le ttrezze, ca voglio saglì.
 DON PIETRO
470Te l’allecuorde?
 VANNELLA
                                E ccomme.
 DON PIETRO
 O ccancarella!
 VANNELLA
                             Ora su covernateve:
 ca è bregogna sta troppo co ll’uommene.
 DON PIETRO
 Statte ca, che bregogna?
 VANNELLA
                                               None none.
 DON PIETRO
 Sine sine.
 VANNELLA
                      No.
 DON PIETRO
                                Sì. (Ma non se parte:
475chesta nne vo, io nce ne do, ch’è bona;
 e ppe la serva lasso la patrona).
 VANNELLA
 (Vi mo, mme squatra co na coda d’uocchie).
 DON PIETRO
 E accossì: io t’aggio genio?
 VANNELLA
 Ah? Comme?
 DON PIETRO
                            Te garbizzo?
 VANNELLA
480Zoè?
 DON PIETRO
             Te paro bello?
 VANNELLA
 E gghiatevenne, mme facite ridere.
 DON PIETRO
 Perché te faccio ridere? (L’afferra pe la mano e nce la stregne)
 VANNELLA
 Ah mannaggia! Mo mme facite chiagnere.
 DON PIETRO
 Ch’è stato?
 VANNELLA
                        Vuje stregnite forte forte.
485Sta mano poverella, che ve fece?
 
 SCENA XVI
 
 Cardella, po Marcaniello e li stisse
 
 CARDELLA
 Sia co ssalute: cinco e ccinco a diece.
 DON PIETRO
 E diece che so binte: damme cca (Vo afferrà la mano de Cardella)
 CARDELLA
 No: ve potite nfra de vuje spassà.
 VANNELLA
 (Chesta attiempo!)
 MARCANIELLO
                                      Pe ggrazia de lo cielo
490sta cojeto lo pede... E mme che gnifeca
 ssa mmenzeone? (Vedenno ca Don Pietro tene pe la mano Vannella)
 CARDELLA
                                   So sposate nzemmora.
 DON PIETRO
 Stevamo conzertanno no balletto.
 Aló aló danzòn. (Va abballà co Vannella)
 MARCANIELLO
                                Oh pazzo, oh pazzo!
 Comme? Co le ccreate...
 CARDELLA
                                              Chiano chiano,
495ch’io fora mme ne chiammo: chessa è cchella
 c’ha la pazzearella.
 VANNELLA
                                     A mme? Lassate. (A Don Pietro)
 DON PIETRO
 Eh stia stia.
 VANNELLA
                         (Mannaggia!)
 DON PIETRO
                                                     Senta, gnore:
 noi cavalieri erranti
 balliam con ogni ceto. A noi, a noi,
500llarai llarà... O mia speme, (S’addona de Nena, ch’è asciuta da la casa)
 sta lei qui adesso? Su balliamo insieme. (Lassa Vannella e bo abballà co Nena)
 
 SCENA XVII
 
 Nena, ch’è asciuta da la casa, e li ditte
 
 NENA
 Scostatevi.
 CARDELLA
                       Mo è bona.
 VANNELLA
                                              (Uh terra aggliutteme).
 DON PIETRO
 Come? Sdegna, che un sposo...
 NENA
                                                          E lei, che sposo
 esser mi de’, può far simil pazzia,
505e darmi gelosia per una serva?
 (Mi giova così fingere).
 CARDELLA
                                             Ha raggione,
 (mettimmo fuoco).
 MARCANIELLO
                                      Zitto tu. (A Cardella)
                                                       Vedite
 comme ca chisto...
 NENA
                                    E tu, e tu sei quella,
 ghe fai la vergognosa,
510la ritrosa con gli uomini?
 CARDELLA
 E ppo a mmano a mmano...
 MARCANIELLO
                                                     O taccariello! (A Cardella)
 VANNELLA
 Isso mm’ave afferrata: io non sapeva
 ca nc’era male.
 DON PIETRO
                              Sì io l’ho acchiappata
 senza malizia.
 CARDELLA
                             E essa, a ccomme pare,
515senza malizia s’ha fatto acchiappare.
 MARCANIELLO
 Deavolo ammutiscela. (A Cardella)
 NENA
 Va, ti castigherò.
 MARCANIELLO
 Via perdonatela,
 ca no lo bo fa cchiù.
 VANNELLA
                                      Segnora mia,
520comm’aggio ditto è stato.
 DON PIETRO
                                                Or la perdoni
 in grazia del suo sposo.
 NENA
                                             E andate via.
 Che siete pur ridicolo.
 CARDELLA
 (Mo si ch’è ffatto già lo matremmonio).
 DON PIETRO
 (Gnore la sposa vo abborlà co mmico).
 MARCANIELLO
525(Sta a bedè, ca nce nasce quarche ntrico).
 VANNELLA
 
    Gnora, crediteme,
 ch’accossì è.
 Gnora, accediteme,
 si n’è accossì.
530Nzemprece nzemprece
 nce so ncappata;
 io mo scasata
 ch’aggio da fa?
 Via, gnora mia,
535no nne sia cchiù.
 
    Io mo... mannaggia...
 Uh pe ll’arraggia
 vorria morire.
 Pe l’abbenire
540quanno ved’uommene
 voglio vedere
 chillo che scria.
 Nce pozza mmattere
 sporchia sciù sciù.
 
 SCENA XVIII
 
 Nena, Marcaniello, Don Pietro e Cardella
 
 CARDELLA
545Vi comme la sa fa la gnemme gnemme!
 E ccridela.
 MARCANIELLO
 Tu nzomma
 non puoje sta, si non faje fuorfece fuorfece?
 NENA
 Voi intanto comparirmi
550più avanti non pensate: io già conobbi,
 che mi siete infedel.
 
 SCENA XIX
 
 Nina da la casa e li ditte
 
 NINA
                                        (Qui son costoro). (Da parte)
 MARCANIELLO
 Vì ch’aje fatto. (A Don Pietro)
 DON PIETRO
                               Sentite,
 madama: le mon coeur...
 NENA
                                                Più non partite?
 DON PIETRO
 Ah le mon coeur, Madama.
 NENA
                                                    Io non vi sento.
 DON PIETRO
555Madama, le mon coeur...
 NENA
                                                O che tormento!
 DON PIETRO
 Madama...
 NENA
                       E pur?
 DON PIETRO
                                      Benaggia crai, Madama!
 Mi lasci almeno dir, che il mio cor l’ama.
 NENA
 Non m’ingannate no.
 NINA
                                         (Che sarà mai?)
 MARCANIELLO
 Segnora, pe l’ammore de lo cielo,
560chisto è schirchio accossì; e mmo, ch’è stato
 fora, chiù s’è scherchiato, de lo riesto
 ve vo bene, ve stimma...
 NENA
                                               E voi volete
 ch’io perda con un pazzo la mia pace?
 MARCANIELLO
 Non segnora, faciteve capace. (E pparla segreto co Nena)
 DON PIETRO
565Mentre lo gnore fa capace a quella
 divertiamoci insieme. (A Cardella)
 CARDELLA
                                            Jatevenne,
 jateve a ddevertire co Vannella.
 Io nce ll’aggio co buje.
 DON PIETRO
                                           Tu ancor gelosa
 sei di me? Nce lo boglio.
 NENA
                                               Non occorre:
570perdete il tempo.
 NINA
                                   Che si fa, germana?
 MARCANIELLO
 Uh! Co llecienzia vosta. (Se fa vecino a Nina)
 NINA
 In colera ti veggio.
 NENA
                                     E ne ho raggione.
 MARCANIELLO
 Non è niente, è no po de gelosia.
 Comme staje, gioja mia?
 NINA
575(È questo un ritrovato).
 DON PIETRO
                                              Ingrognatuccia
 sta un po con me; per altro è compatibile:
 m’ama...
 NINA
                    E chi mai non vi amerebbe?
 DON PIETRO
                                                                         (O cara!)
 NINA
 (Usiam quest’arte).
 MARCANIELLO
                                       Gnò, attennite a mmene. (A Nina)
 NENA
 Sorella, il vedo sì, degno è d’amore;
580ma sdegnato è il mio core.
 NINA
                                                  Io per lui sdegno
 non sentirei, se lo potessi amare.
 DON PIETRO
 (Chesta puro nne vo).
 NENA
                                           (Ve come finge!)
 MARCANIELLO
 Sia Ni, chesto che bene a gnefecare?
 NENA
 E tu ancora vuoi darmi gelosia? (A Nina)
585Mancava questa pena all’alma mia! (Trase)
 DON PIETRO
 Poveretta!
 MARCANIELLO
                      Ha raggione:
 Uscia ha d’amà lo patre, e nno lo figlio.
 NINA
 È ver: però vi spiego i sensi miei:
 amo il padre; ma il figlio più amerei. (Trase)
 DON PIETRO
590E biva. Tutto il mondo
 è invaghito di me!
 CARDELLA
                                     (Io non lo ccredo
 co ttutto ca lo bedo. Ma nne voglio
 avesà la segnora de sto mbruoglio). (Trase)
 
 SCENA XX
 
 Marcaniello e Don Pietro
 
 MARCANIELLO
 Chesto che bene a ddì?
 DON PIETRO
                                             Gnore...
 MARCANIELLO
                                                              Va a ccancaro.
595Donca Nina...
 DON PIETRO
                            Io non colpo...
 MARCANIELLO
                                                        Va a deaschence.
 DON PIETRO
 Ma senta: colpa a questo
 il mio sangue attrattivo.
 MARCANIELLO
 Che non nce fusse maje venuto vivo...
 Uh mannaggia. (E lo pede n’autra vota
600mme fruscia justo mo).
 DON PIETRO
                                              Ma gnore mio...
 MARCANIELLO
 Oh che ssinghe scannato tu, e io.
 
    Tu si ggruosso quanto a n’aseno,
 e non miette cchiù gghiodicio..
 
 DON PIETRO
 
 Infadarsi è uno sprosito.
605Non volendo,
 non sapendo,
 io v’ho fatto mal’ufficio.
 
 MARCANIELLO
 
 E ttu, sgrata,
 si sbotata...
 
 DON PIETRO
 
610Colpa mia non fu, non è.
 
 MARCANIELLO
 
 Tu che ppesta vuoje da me?
 
 DON PIETRO
 
 Io non colpo, o genitore
 colpa sol la mia beltà.
 
 MARCANIELLO
 
 Bene mio ca lo dolore
615già mme torna a pezzecà.
 
 Scompe l’atto primmo