Lo frate ’nnamorato, libretto, Napoli, De Bejase, 1734

 ATTO SECUNNO
 
 SCENA PRIMMA
 
 Luggrezia e Cardella da la casa
 
 CARDELLA
 Lassatem’ire mo pe sto servizeo,
 ca po n’è ora cchiù.
 LUGGREZIA
                                      Mo vaje. Addonca
 trasuta è ngelosia Nena co ffratemo?
 CARDELLA
 Cierto, e l’ha ditto tanta brutte ngiurie;
620l’ha chiammato rericolo.
 LUGGREZIA
                                               Ca chillo
 stea pazzeanno co Vannella?
 CARDELLA
                                                      Appunto:
 co cchella fina pezza.
 LUGGREZIA
                                        No: mme pare
 Vannella bona figlia.
 CARDELLA
                                        Che ddecite!
 Bona figlia songh’io.
 LUGGREZIA
                                        Sì: veramente
625comm’a tte n’autra nc’era, e la scuressa
 se la portaje la lava.
 CARDELLA
 Ora tenitemente!
 chest’autro de sentire mme mancava.
 Donca io so ttrista mo?
 LUGGREZIA
                                             Parlammo a nnuje.
630Lo gnore...
 CARDELLA
                       Uh co lo gnore nc’è rroina.
 L’ha ditto nfacce Nina,
 ca amma cchiù lo figlio de lo patre:
 e a cchesto po cchiù s’è mpestata Nena.
 LUGGREZIA
 Puro pe ggelosia?
 CARDELLA
                                   Gnorsì. Ma Nina
635mme pare, c’ha jodizeo;
 che nn’ha da fa no viecchio pelagruso?
 LUGGREZIA
 Cca mo nce nasciarrà non precepizeo.
 E cchesto fa pe mme. Li matremmonie
 de lo gnore, e dde fratemo
640cossì se mbrogliarranno; e io mme levo
 Carlo accossì da tuorno.
 CARDELLA
 Ma pe cqua causa chillo no v’ha genio?
 LUGGREZIA
 Che ggenio? Ca pe mme è no male juorno.
 CARDELLA
 E pperché? Chillo è ggiovene,
645non è brutto a bedè. Po tanto bello
 sape fa ceremonie, or linci, or quinci.
 LUGGREZIA
 Non te lo ppozzo dire o pperché.
 CARDELLA
 Vuje quacc’autro milordo avite ncore.
 No nce aggio annevenato?
 LUGGREZIA
650Justo mmiezo nce aje dato.
 CARDELLA
 Deciteme chi è?
 LUGGREZIA
                                 Va, ca si ppazza.
 Ora sienteme a mme: tu ste romane
 non perdere de vista;
 stance co lo pensiero; e, ssi autro saje,
655tu vienemello a ddì. Ah? Lo starraje?
 CARDELLA
 Perché nno? Ma vuje po mme deciarrite,
 chi è l’amico Cesare?
 LUGGREZIA
                                         Chi Cesare?
 CARDELLA
 Chillo che buje...
 LUGGREZIA
                                  Io che?
 CARDELLA
                                                  E gghiatevenne.
 Comme site accossì!
 LUGGREZIA
                                        Tu si ncocciosa:
660ca vuoje sapè na cosa,
 ch’io no nte pozzo dì.
 CARDELLA
                                         Ma perché mmaje?
 LUGGREZIA
 Oh sto pperché mmarditto!
 Sto pperché dì non pozzo, t’aggio ditto.
 
    Lo trommiento,
665c’ha sto core,
 no lo pozzo dechiarà;
 pe cchiù ppena, e ppe cchiù stiento,
 ll’aggio schitto da soffrì.
 
    A lo mmanco lo dolore
670farria lieggio co sfocà:
 già lo ssaccio;
 ma che ffaccio,
 si la sciorte vo accossì?
 
 SCENA II
 
 Cardella
 
 CARDELLA
 Chesta mme vo fa locca, e non sa, ch’io
675saccio contà nzi a cciento, e cciento e uno.
 Vi si nce vole zingara
 p’annevenà sta sciorte. Sta ncappata
 co n’autro, e beccotella annevenata.
 E cchisto chi po essere?
680Cca ncoppa non nce sta cosa a ppreposeto.
 Io mo nce nguaggiarria,
 ca chella de qua lloteno
 s’è ncaprecciata, e ha scuorno de lo ddicere.
 E cche? Soccede. Spisso cierte ffemmene
685te lassano lo mmeglio pe lo ppeo.
 Si ca ll’uommene no? Mme ne spejace
 quanta vote lo ffanno;
 né mme nce pozzo propio dare pace.
 
    Vide ciert’uommene
690senza judiceo,
 che sto sperute,
 stanno alloccute:
 chi pe na smorfia,
 chi pe na scirpia;
695e ppo te lassano
 na lattuchella,
 na pempenella.
 Uh mpise mpise!
 Via mme nce vene l’arraggia affè.
 
700   E dapò diceno,
 pe se scosà:
 chella nce ha ggenio,
 che s’ha da fa?
 Che siano accise:
705che ggenio brutto, sciù leva le!
 
 SCENA III
 
 Marcaniello
 
 MARCANIELLO
 Io mme lo vao sonnanno
 no brutto schiuoppo pe sti matremonie:
 già la varca la vedo i mmertecanno.
 E a ttutto corpa figliemo. Lo schirchio
710mme fa lo franzesotto. Abballa, canta,
 se picca de bellezza, e mme sta a ffare
 co cchesta, e cco cchell’autra lo trastullo.
 Mm’è asciuto co lo donno! Vi che donno
 quanno io n’aggio sto donno. Co sta cosa
715io mm’arraggio, e mme ntosseco,
 e la polagra carreca refosa.
 
 SCENA IV
 
 Vannella da la casa e Marcaniello
 
 VANNELLA
 Vide, si lo tentillo
 la potea nzertà peo!
 MARCANIELLO
                                       (Chest’autra puro
 mm’ha sconquassato).
 VANNELLA
                                            Stea co chill’argenio
720spassannome, ed attiempo...
 MARCANIELLO
                                                      Ne Vannella,
 nc’è lo si Carlo ncoppa?
 VANNELLA
                                             Vuje cca ssite?
 Scostateve, arrassateve,
 jatevenne, fuite.
 MARCANIELLO
                                 Tu che d’aje?
 VANNELLA
 E non foite cchiù?
 MARCANIELLO
                                    Ch’aggio qua ppesta
725ncuollo?
 VANNELLA
                   Na cosa simmele. Site ommo,
 e io ll’uommene...
 MARCANIELLO
                                    Ntenno; ma ciert’uommene....
 VANNELLA
 Io non saccio. Arrassateve. (Lo votta)
 MARCANIELLO
                                                    Oh che ffaje!
 Che mme vuoje fa cadere? (E ssarria bella).
 VANNELLA
 Uommene? Sarva sarva.
730(Li vecchie non perrò).
 MARCANIELLO
                                             Siente, Vannella:
 è bero, ch’a la femmene
 co ll’uommene parlà non è dde bene;
 ma se ntenne co ccierte zerbinotte,
 non co ll’uommene sode comm’a mmene.
 VANNELLA
735Viecchie volite dì?
 MARCANIELLO
                                     Che biecchie? Sode.
 VANNELLA
 Sì, sode comm’a buje, azzoè biecchie?
 non site viecchio vuje?
 MARCANIELLO
                                            So... che parola,
 che mmo mm’è stata mmocca!
 VANNELLA
 (Se la sente). Scosate, ch’io so llocca,
740e ccredea, ch’era viecchio n’ommo, quanno
 è tutto jancheato,
 e ppatesce de tossa, e dde polagra...
 MARCANIELLO
 Orsù, orsù vattenne: ch’a le ffemmene
 no è de bene de parlà coll’uommene.
 VANNELLA
745Ma vuje mm’avite ditto, ca no mporta,
 si ll’uommene so biecchie.
 MARCANIELLO
                                                   Oh tu mme vuoje...
 VANNELLA
 No no, sode: scosate, ca la lengua
 sempre mme vatte lla.
 MARCANIELLO
 E io ssa lengua te voglio sceppà.
 VANNELLA
750E ccomme l’afferrate? Io no la caccio.
 MARCANIELLO
 Via ammarcia. Si nc’è ncoppa lo si Carlo,
 dille, ca lo vogl’io.
 VANNELLA
                                   Non nc’è gnernone.
 Che d’è ssa mala grazia?
 vuje mo starrite ncollera. Io che ffaccio?
755No nce tenite mente
 a le pparole meje: perché io... Sentite:
 parlo accossì nnozente.
 MARCANIELLO
                                            Figlia mia,
 tu sse ccose de viecchio, e dde polagra
 no le ddicere cchiù.
 VANNELLA
                                      So ccose brutte?
 MARCANIELLO
760Bruttisseme.
 VANNELLA
                           (Nte co’, perché te pogneno).
 MARCANIELLO
 E n’autra cosa: quando vide figliemo
 tu fujelo. Non vi, ca la sia Nena
 s’è pposta ngelosia?
 VANNELLA
 Ed a cqua ggelosia? Nuje a la casa
765non ne avimmo: nce so le betrejate.
 (Fegnimmo de no ntennere).
 MARCANIELLO
                                                        Vo dicere
 la ggelosia, quann’uno fa l’ammore...
 VANNELLA
 E buje mo mme volite
 parlà de fa l’ammore? Maramene!
 MARCANIELLO
770No, siente...
 VANNELLA
                         Arrasso, arrasso.
 
 SCENA V
 
 Nina, ch’è stata a ssentì, e li stisse
 
 NINA
                                                         O bene, o bene!
 Voi ancor con costei? E si raggiona
 di far l’amore? Or sì del vostro figlio
 i costumi comprendo:
 da voi, che padre siete, ei gli ave appresi.
 VANNELLA
775(Ch’aggio fatto!)
 MARCANIELLO
                                 (Mo è mmeglio). Uscia se nganna.
 NINA
 Come ingannarmi, se già il tutto intesi?
 MARCANIELLO
 Io decea...
 NINA
                      Non occorre il replicarlo.
 MARCANIELLO
 Dillo ttu (A Vannella)
 VANNELLA
                    Ll’ha sentuto la segnora.
 MARCANIELLO
 E cche decea bonora?
 VANNELLA
                                          Vuje decivevo:
780fa l’ammore...
 MARCANIELLO
                             Co ttico?
 VANNELLA
                                                Io mo che ffaccio?
 Segnò, parlate vuje, ca io mme mbroglio.
 NINA
 Io più parlar non voglio.
 Basta: oprerò.
 VANNELLA
                             Vuje già l’avite visto,
 ch’io non corpo. Che ffaccio. (A Nina)
 MARCANIELLO
                                                      Io stea decenno
785a sta fegliola cca...
 NINA
                                   Come doveva
 far all’amor con esso voi.
 MARCANIELLO
                                               Gnernò.
 Decea...
 NINA
                  Che volevate
 far all’amore un po con lei.
 MARCANIELLO
                                                   Gnernò.
 Decea...
 NINA
                  Pur col diceva?
 MARCANIELLO
                                                E non volite
790farme dì, comme cancaro deceva?
 Chesta è schiattiglia... uh uh. (Tossa)
 NINA
                                                        (Mi venne fatta).
 VANNELLA
 (Lo scurisso mo schiatta).
 MARCANIELLO
                                                 Bella scusa
 pe ffareve da coppa! Già lo ssaccio,
 ch’amate cchiù lo figlio de lo patre.
795Eh bonora...
 NINA
                          Va sciocco. Io amar tuo figlio?
 Tue mancanze così vuoi tu scusare.
 MARCANIELLO
 Che mmancanze... Uh sta tossa! E mmanco pozzo
 parlà!
 VANNELLA
               (Vedite chi se vo nzorare!)
 MARCANIELLO
 Uscia senta no poco...
 NINA
                                          Eh vanne via.
 MARCANIELLO
800Ma comme...
 NINA
                           Eh taci.
 MARCANIELLO
                                            Io mo mme scannarria.
 NINA
 
    Ti scaccio dal mio petto,
 e d’un più degno oggetto
 amante mi farò.
 
    Conosco ben chi sei:
805a te gli affetti miei
 io più non serberò.
 
 SCENA VI
 
 Marcaniello e Vannella
 
 VANNELLA
 Derria mo chi lo ttutto non sapesse,
 ch’essa ha raggione. E bi sto poveriello
 comm’è rrestato! Io voglio
810darle la quatra. Ne, si Marcaniello
 venesse chesto a ddi la gelosia?
 MARCANIELLO
 Vene a ddi lo mmalan, che Dio te dia.
 VANNELLA
 Sentito mo! Perché mme jastemmate?
 MARCANIELLO
 Tu nce aje arrojenate a mme, e a ffigliemo.
 VANNELLA
815Vuje n’avite da fa li matremmonie?
 MARCANIELLO
 Nuje farrimmo la pesta, che nce sfrecola.
 VANNELLA
 (Se lo bace sonnanno).
 MARCANIELLO
                                            E Nina... auh torca,
 accossì mm’aje scacciato?
 VANNELLA
 Ne? fosse stato ca site ommo sodo?
 MARCANIELLO
820Tu lo vuoje no schiaffone.
 VANNELLA
                                                 Arrasso sia!
 Lo ddi ommo sodo puro è brutta cosa?
 MARCANIELLO
 Senta osseria! Io magno fele, e cchesta
 mme vole fa crepà na vena mpietto.
 VANNELLA
 Ma vuje... io mo... mannaggia! (Che spassetto!)
 MARCANIELLO
 
825   Gioja mia, mme vuoje lassare
 nigro, affritto, e sconzolato.
 Io scasato ch’aggio fatto?
 Niente, affatto. Dillo ttu (A Vannella)
 comme fu, parla pe mme.
 
830   Si de st’arma lo sciatillo,
 si tu si lo speretillo,
 senza te pozz’io campare?
 Signornò. Ma n’è accossì? (A Vannella)
 Signorsì ch’accossì è.
 
 SCENA VII
 
 Vannella
 
 VANNELLA
835Vuoje sta frisco. Ma vi che mmenzeone
 de le ppatrune meje!
 Che bella accaseone,
 asciato ha la sia Nina, pe cchiarirelo.
 Ch’autra chiù bella n’asciaje la si Nena,
840pe cchiarire lo figlio! Io nzomma servo
 pe scusa a ttutte doje? Ora nuje femmene
 (e io apprimmo apprimmo)
 tutta, anze cchiù cche ttutta la sapimmo.
 
    Chi disse, ca la femmena
845sa cchiù dde farfariello,
 disse la veretà.
 
    Una te fa la nzemprece,
 ed è mmalezeosa.
 N’autra fa la schefosa,
850e bo lo maretiello.
 Chi a cchillo tene ncore,
 e a cchisto fegne ammore;
 e lo sta a rrepassà.
 
    Nce sta quaccuna po,
855che a nnullo vole bene,
 e cciento nfrisco tene,
 schitto per scorcoglià.
 E ttant’autre mmalizie
 chi maje le ppo contà?
 
 SCENA VIII
 
 Don Pietro e Ascanio
 
 DON PIETRO
860Caro il mio Ascanio, così è: proibbeto
 io mme so ffatto per la mia beltà;
 e ppe la chiazza ggià non pozzo i cchiù.
 O mon Dieù, o mon Dieù!
 ASCANIO
                                                  Si è bero chello,
 che chisto ha ditto, io maro me so gghiuto.
 DON PIETRO
865Tanto che ho risoluto,
 pe llevare ogne scandalo, o mme faccio
 nfaccia no sfriso, e mi straviso il volto,
 o in quattro mura me ne sto sepolto.
 ASCANIO
 Addonca la sia Nena...
 DON PIETRO
                                           Per la serva
870Nena s’ingelosì,
 e lassa! impallidì.
 ASCANIO
                                   (O arma ngrata!)
 E la sia Nina...
 DON PIETRO
                              E Nina
 il padre rifiutò,
 e per me sospirò.
 ASCANIO
                                   (O senza fede!)
 DON PIETRO
875Ma fu risa col padre.
 ASCANIO
                                        Ah! chi lo ccrede?
 DON PIETRO
 Ora vedimmo... Uh zitto: vecco Nena.
 ASCANIO
 (Già lo sango se jela nn’ogne bena).
 
 SCENA IX
 
 Nena e li ggià dditte
 
 NENA
 (Oh questo matto è qui? E seco è Ascanio).
 DON PIETRO
 (Sta dritta sta pirucca?)
 ASCANIO
                                              (Sta bellissema).
 NENA
880(Or che farò?)
 ASCANIO
                             (Mme stongo, o mme ne vao?)
 DON PIETRO
 Posso dirvi, idol mio, che lei, cecata
 da gelosia tiranna,
 d’infedeltade a torto mi condanna?
 NENA
 Signor Ascanio, una parola in grazia.
 DON PIETRO
885Cieli! Che uscita è questa?
 ASCANIO
                                                   A mme bolite?
 NENA
 Sì, venga.
 ASCANIO
                     Descorrite
 mo co Don Pietro.
 NENA
                                    Poi...
 DON PIETRO
                                                No: vada, vada,
 dia gusto a la segnora.
 ASCANIO
                                           Io non vorria,
 che buje...
 DON PIETRO
                      Eh vada: ch’io non son geloso,
890so ccorrentone. (Chella
 te vo parlà de me).
 ASCANIO
                                     Bene. (Se mettono a pparlà segreto Nena e Ascanio)
 NENA
                                                  È ritroso
 così Ascanio con Nena? Ahi!
 DON PIETRO
                                                      (Che sospiro!)
 NENA
 Non sarebbe così se Nina fusse.
 DON PIETRO
 (Chella le dice mo, ch’io so un infido).
 ASCANIO
895Comme Nina? Tu, e Nina... ma parlammo
 de te. Lo ppuoje negare,
 ca ngrata tu mme si?
 NENA
                                         Oh Dio puoi dirlo?
 Ah! Fossi tu, qual io, grato e fedele.
 DON PIETRO
 (Quanto sospira Nena! Ah no, mia vita,
900non sospirar).
 ASCANIO
                             Ma comme? Lo ssentire
 gelosia pe Don Pietro n’è lo stisso,
 che bolè bene a isso, e a mme tradire?
 DON PIETRO
 (Ascanio bravo se va carrecanno,
 la persuadarrà).
 NENA
                                 Mirate inganno!
905Io finsi ciò, per trattener le nozze,
 che affretta il zio; del resto egli m’è odioso
 più che la morte.
 DON PIETRO
                                  (Mmo senz’auto Nena
 ha ditto, ca per me non ha riposo).
 ASCANIO
 Addonca...
 NENA
                       E Nina... io lo dirò (so bene,
910che saperlo ti preme), a questo effetto
 finse anco amor con lui.
 ASCANIO
                                              A mme de Nina
 no mporta...
 NENA
                          No? Eh Ascanio....
 ASCANIO
                                                             (Io già mme mbroglio).
 NENA
 Ma confonder ti voglio; e, perché vegga
 tu la mia fedeltà, chiama Don Pietro.
 ASCANIO
915Perché?
 NENA
                  Chiamalo dico.
 ASCANIO
                                                (O Dio!) Faoresca
 si Don Piè (so cconfuso).
 DON PIETRO
                                               È già placato
 l’idolo mio sdegnato?
 ASCANIO
                                          Uscia nce parle.
 DON PIETRO
 Bella...
 NENA
                M’ascolti.
 DON PIETRO
                                    Dica.
 NENA
                                                Omai dal core
 togliti la lusinga: io per te amore
920non sento affatto.
 DON PIETRO
                                   Ascanio?
 NENA
                                                      Alle mie nozze
 più non pensar.
 DON PIETRO
                                Ascanio?
 NENA
                                                   La mia destra
 non stringerai.
 DON PIETRO
                              Ascanio mmalora!
 ASCANIO
 Che bo da me?
 DON PIETRO
                               Che mai gnifica, o Dio!
 questo ambicuo parlar?
 ASCANIO
                                              E cche ssacc’io?
 NENA
 
925   Son pur chiari i sensi miei:
 io non t’amo,
 non ti bramo;
 troppo sei
 odioso a questo cor.
 
930   Folli sono i tuoi pensieri;
 e se speri
 la speranza è ben fallace;
 datti pace,
 cangia voglie e cangia amor.
 
 SCENA X
 
 Don Pietro e Ascanio
 
 DON PIETRO
935Stelle, inclementi stelle! E lo mirate,
 e pur non vendicate i torti miei?
 ASCANIO
 Lo ccredo o no, chello che ha ditto Nena?
 DON PIETRO
 Ma cosa disse a te? tu che dicesti
 a quella fiera, a quella tigre armena?
 ASCANIO
940Che boze dì? Mme disse...
 DON PIETRO
                                                  Parla. (Ingrata!)
 ASCANIO
 (Che scusa trovo?)
 DON PIETRO
                                     Parli, o no?
 ASCANIO
                                                            Mme disse,
 ca uscia... ca essa... ca Nina...
 DON PIETRO
                                                      Bel bello:
 Tu parli a saltarello. Oh qui ci è imbroglio.
 Quanto va, ca m’hai fatto qualche posta?
 ASCANIO
945Gnernò...
 DON PIETRO
                     Gnorsì. Ma tu tutto ti storci,
 e ti contorci? che vuol dir mai questo?
 parla morbleù! o ch’io m’inzolfo, e mpesto!
 ASCANIO
 
    Che boglio parlare,
 che ppozzo maje dire?
950Ca parlo, ca dico,
 non esco da ntrico.
 Sto ttanto mbrogliato,
 che ggià sconfedato,
 mme so de campà.
955Lassateme ire,
 lassateme stà.
 
    E bi si po fare
 pe mme cchiù la sciorte!
 Io chiammo la morte
960né bole venì.
 Lassateme stare,
 lassateme ì.
 
 SCENA XI
 
 Don Pietro e po Cardella
 
 DON PIETRO
 Quegli l’è matto. È matto: io dimand’aglie,
 ei risponde cipolle. Ah meschinello!
965Me ne duole: io lo stimo qual fratello.
 CARDELLA
 Si Don Pietro ched’è? Ve veo colereco.
 DON PIETRO
 Io stongo malinconico e stizzoso,
 e nfra la stizza e la malinconia,
 che ti fa questo core arrasso sia!
970Sembra una nave in mezzo a un mar cruccioso.
 CARDELLA
 Se vede sa, ca state scolorito.
 DON PIETRO
 Scolorito! Oimè lasso! (Caccia lo specchio e se mmira)
 CARDELLA
                                            (Vi che burla).
 DON PIETRO
 Oimè oimè ch’io sto ncadaverito.
 CARDELLA
 (S’ha puosto apprenzeone).
 DON PIETRO
                                                     Ecco trionfa,
975Nena, la tua fierezza:
 tu hai fatto tramontar la mia bellezza.
 CARDELLA
 Donca Nena...
 DON PIETRO
                             O vergogna! E cchi cchiù bole
 comparè co sta facce?
 CARDELLA
                                          S’arremmedea
 chesso co nniente.
 DON PIETRO
                                    E ccome?
 CARDELLA
                                                        Comme fanno
980le ffemmene.
 DON PIETRO
                            Cioè?
 CARDELLA
                                         Cioè? Se conciano.
 DON PIETRO
 Mmalora! Dici ben; m’hai suggerita
 na gran specie!
 CARDELLA
                               Starriano conzolate
 si no, tanta schiavizze, e nzolarcate.
 DON PIETRO
 Ma come si farà?
 CARDELLA
                                  Saglimmo ncoppa.
985Io saccio addove sta la carrafella
 de la segnora... vasta...
 DON PIETRO
                                           O gran Cardella!
 Sente: pe ttutta craje io te mmarito.
 CARDELLA
 Davero?
 DON PIETRO
                   Il giuro.
 CARDELLA
                                    Uh bene mio!
 DON PIETRO
                                                                Lo mmierete.
 Tu sanasti la mia piaga insanabile.
 CARDELLA
990Io te farraggio ire all’incorabbole.
 DON PIETRO
 
    Il fior di questo core
 nel prato del mio petto,
 seccato e senza umore,
 languiva il poveretto;
995tu fosti la rugiada,
 per cui s’invigorì.
 
    O mia rugiada bella,
 dolcissima Cardella,
 quanto ti devo sì!
 
 SCENA XII
 
 Nena e Nina da la Casa
 
 NENA
1000Credimi, Nina, io non potea più chiaro
 con Don Pietro spiegarmi.
 NINA
                                                  Al padre anch’io
 aperto favellai.
 NENA
                              Finiran pure
 d’esserne più nojosi.
 NINA
                                         Ma col zio
 come farem?
 NENA
                           Col zio? Non è già servo
1005il voler nostro al suo.
 NINA
                                        Dunque ad amare
 tu seguirai quei, che finora amasti.
 NENA
 Oh sì! Anzi d’amar non lascerai
 chi tu amasti finora.
 NINA
                                        Ed io chi amai?
 NENA
 E da me chi si amò?
 NINA
                                        Eh Nena.
 NENA
                                                            Eh Nina.
 NINA
1010Tu fingi non intendere, e m’intendi.
 NENA
 Non comprender tu fingi, e pur comprendi.
 NINA
 Su dimmel chiaro.
 NENA
                                     Ciò che in cor nascondi,
 su palesa.
 NINA
                     Il paleso...
 NENA
                                          Io chiaro il dico;
 ma ne averai tu pena.
 NINA
1015Ma dispiacer ne avrai.
 NENA
                                            Eh Nina.
 NINA
                                                               Eh Nena.
 
 SCENA XIII
 
 Ascanio e le stesse
 
 ASCANIO
 So ntriche chisse, addò ave puosto ammore
 st’annegrecato core? (Nfra se stisso)
 NENA
 (Ma risolviamci al fine... Oh qui sta Ascanio?)
 NINA
 (Ma vegniamo alle strette... È Ascanio quegli?)
 ASCANIO
1020Gelosia mme rodèa: mme sacredette,
 e ncagno de fa meglio, io peo facette.
 NINA
 (Da se solo ei favella).
 NENA
                                           (Egli è pensoso).
 ASCANIO
 Io so pperzo! E arreddutto a cche mm’avite.
 O Nina, o Nena, o ammore... O vuje cca ssite? (S’addona de Nina e Nena)
 NENA
1025E tu opportuno giungi.
 NINA
                                            A tempo vieni.
 ASCANIO
 Comm’a ddì?
 
 SCENA XIV
 
 Luggrezua da lo barcone e li ditte
 
 LUGGREZIA
                            (Che ffa Ascanio llà co cchelle?)
 NINA
 Nena chiedeati.
 NENA
                                Eh no: chiedeati Nina:
 con lei ragiona.
 NINA
                               Eh no: con lei favella.
 LUGGREZIA
 (Oh chesta è bella! Se lo pallotteano).
 NINA
1030Via su. (A Nena)
 NENA
                 Su via. (A Nina)
 ASCANIO
                                (Vedite che roina!)
 NINA
 Or non parli? (A Nena)
 NENA
                             A che taci? (A Nina)
 NINA
                                                   Eh Nena.
 NENA
                                                                       Eh Nina.
 ASCANIO
 Ah! Sto parlare muzzo io già lo ntenno;
 fegnere dovarria de non sentire;
 ma, perché de morire
1035già tengo ncapo, io voglio
 morì, crepà: e ddechiarà sto mbruoglio.
 LUGGREZIA
 (Che ssarrà bene mio?)
 NINA
                                              Parla.
 NENA
                                                           Discorri.
 ASCANIO
 Nina, tu mme vuoje dire: Ascanio, io t’ammmo.
 Io t’ammo, Ascanio: mme vuoje dire Nena.
1040Cara, io responno a tte, te voglio bene.
 Bella, te porto affetto, io a tte responno.
 Lassare ll’una, o ll’autra? Ah non sia maje:
 no mme fido, non pozzo; e ggià lo bedo,
 ch’amanno a ttutte doje,
1045so a ttutte doje nfedele. Lo castico
 se mmereta sto core,
 che die recietto a lo cchiù strano ammore.
 Spetacciatelo addonca,
 facitene vennetta;
1050datele lo castico, che le spetta.
 LUGGREZIA
 Tutto chesto avea ncuorpo sto forfante?
 NINA
 Nena, intendesti?
 NENA
                                    L’ascoltasti, Nina?
 NINA
 E fia ver ciò che dici? (Ad Ascanio)
 NENA
                                           E ’l ver ci narri? (Ad Ascanio)
 ASCANIO
 Eh, si fosse boscìa,
1055accossì desperato io no starria.
 NINA
 Adunque io fra contenti
 esser debbo infelice?
 ASCANIO
 Ma che nce pozzo fa?
 NENA
                                         Son io fra gioje,
 e goder non mi lice?
 ASCANIO
1060Ma che fare io nce pozzo?
 NINA
                                                 Ah sorte!
 NENA
                                                                    Ah stelle!
 ASCANIO
 Che stelle, o sciorte! Vuje, vuje doje corpate.
 NINA
 Come?
 NENA
                 Perché?
 ASCANIO
                                  Ca tutte doje mm’amate.
 NINA
 Nena, lascia d’amarlo.
 NENA
 Lascia d’amarlo, o Nina.
 ASCANIO
                                               Anze corpo io,
1065che ddette esca a ddoje sciamme.
 NINA
                                                               Amar puoi dunque
 me sola.
 ASCANIO
                   E Nena?
 NENA
                                     Ama me sola adunque.
 ASCANIO
 E Nina? Oh Dio! Scompitela, e llevate
 da lo munno chi è ccausa de sto mmale:
 date, dateme morte.
 LUGGREZIA
1070(Cchiù sentì no mme fido). (Trase)
 NINA
                                                     Ah stelle!
 NENA
                                                                         Ah sorte!
 
    Se ’l foco mio t’infiamma,
 risolvi dal tuo petto
 scacciar ogni altro affetto.
 
 ASCANIO
 
 Ah! No lo ppozzo fa.
 
 NENA
 
1075   Se brugi alla mia fiamma,
 risolvi dal tuo cuore
 bandir ogni altro amore.
 
 ASCANIO
 
 Ah no, no nce penzà.
 
 NINA E NENA A DUE
 
 Ma questa è crudeltà.
 
 ASCANIO
 
1080   Ch’affanno è cchisto o Dio!
 Ah ca non pozzo cchiù.
 
 NINA E NENA A DUE
 
 Più barbaro, più rio
 di te giammai non fu.
 
 NINA
 
    Vedi, ch’io per te moro.
 
 NENA
 
1085Vedi, ch’io son fedele.
 
 ASCANIO
 
 Si bene mme volite,
 ve preo, che mm’accredite.
 
 NINA
 
 Porgi al mio mal ristoro.
 
 NENA
 
 Non esser più crudele.
 
 A DUE
 
1090Risolviti su su!
 
 ASCANIO
 
 So rresoluto sì,
 ma schitto de morì;
 dateme morte su. (Se ne traseno Nina e Nena)
 
 SCENA XV
 
 Ascanio, Luggrezia n’autra vota a lo barcone e Marcaniello da parte
 
 LUGGREZIA
 (L’amico ancora è cca).
 MARCANIELLO
                                             Io aggio scurzo
1095Capo de Monte, accossì zuoppo e buono,
 né ttrovo lo si Carlo. E sta a bedere
 che schiuoppo co sti piede
 co ttanto trapazzarele.
 ASCANIO
                                           Io che ffaccio
 cchiù cca? Jammo a mmorire...
 LUGGREZZIA
                                                           Oh galantommo;
1100comme? p’amare a mme ive trovanno
 tanta scuse, e raggire? Tu si cchillo,
 che nzorà no nte vuoje,
 eppo vuoje bene a ddoje?
 MARCANIELLO
                                                 (Chesta che ddice?)
 LUGGREZIA
 Cride tu, ch’io non saccio quanto passe
1105co sse romane? Io ntiso aggio lo ttutto.
 MARCANIELLO
 (Comme comme?)
 ASCANIO
                                      Luggrezia...
 LUGGREZIA
                                                              Va frabbutto. (Luggrezia serra na fenesta nfacce ad Ascanio e trase, e cchillo resta ncantato)
 
 SCENA XVI
 
 Carlo, che bene a ttiempo quanno se ne trase Luggrezia, Ascanio e Marcaniello da parte.
 
 CARLO
 Che inciviltà! Una finestra in faccia
 ad un quasi fratello?
 MARCANIELLO
                                        (O bravo! o bravo!)
 CARLO
 La mia sposa è inurbana! Io vi son schiavo,
1110signor Ascanio: servo suo umilissimo.
 Non corrisponde? È fuor di sé. Bisogna
 compatir: grande fu la scortesia.
 ASCANIO
 Ah! ca chi mm’accedesse, io pagarria. (E se nne va desperato)
 
 SCENA XVII
 
 Marcaniello e Carlo
 
 CARLO
 Povero galantuom, dà quasi in furie!
 MARCANIELLO
1115(Cca nce sarrà no mbruoglio del diavolo).
 CARLO
 Oh signor mio... Attempo: io v’ho a dir cose
 urgenti, e premurose.
 MARCANIELLO
                                           Io puro a uscia.
 CARLO
 Dica...
 MARCANIELLO
               Parlate...
 CARLO
                                  No, dica ella...
 MARCANIELLO
                                                              E bia.
 CARLO
 Signor mio, se ho a sposar vostra figliuola,
1120è d’uopo ch’ella (e vi fo chiari i patti)
 s’impari ben le cerimonie e i tratti.
 MARCANIELLO
 E cchesto mm’ha da dì?
 CARLO
                                              Questo: i principj
 ella non sa. (Finestre in faccia!)
 MARCANIELLO
                                                            Uscia
 pazzea, parla de tratte, e zeremonie,
1125e nnuje li matremmonie
 no le ffarrimmo.
 CARLO
                                 E come?
 MARCANIELLO
                                                   Io voglio i ncoppa,
 pe ssapere da figliema no mbruoglio:
 mo mmo scenno, e pparlammo.
 CARLO
                                                            Me ne dica
 or qualche cosa.
 MARCANIELLO
                                Po te dico tutto.
 CARLO
1130Oh Dio....
 MARCANIELLO
                     Via mo.
 CARLO
                                      Ma questa è scortesia.
 MARCANIELLO
 Io mo so cco osseria.
 CARLO
                                        Questa è rozzezza.
 MARCANIELLO
 Mo nce vedimmo.
 CARLO
                                    Questa è inciviltà.
 MARCANIELLO
 E agge freoma, ch’io mo mmo so cca. (Trase a la casa)
 CARLO
 
    Mi palpita il core,
1135non ho più in me calma;
 sospetto e timore
 mi affliggono l’alma.
 O Dio! Che sarà?
 
    Del ben, per cui vivo,
1140vuol rendermi privo
 mia stella rubella?
 Saria crudeltà.
 
 SCENA XVIII
 
 Don Pietro co la facce conciata, ch’esce correnno co la perucca mmano, e Cardella co lo pejattiello de russo, e ppo Vannella da la casa
 
 DON PIETRO
 No nce vo autro via: sto no spavento.
 Lassame mette la perucca.
 CARDELLA
                                                   None:
1145nce vo cchiù rrusso a cchella via.
 DON PIETRO
                                                             Sollecita
 su, ch’io son già stufato. (Vannella mette cchiù rrusso nfacce a Don Pietro)
 CARDELLA
 Ma si nce ha sconcecato
 a lo mmeglio lo gnore...
 VANNELLA
                                             (Maramene!
 che ffanno chilli lla? Sciù che bregogna!
1150Se concia; e ppo mmiezo a la chiazza).
 DON PIETRO
                                                                       È llesto?
 CARDELLA
 
 È llesto. (Ll’aggio fatto comm’a mmaschera).
 Su mmerateve mo. (Don Pietro se mmira) Ah che ve pare?
 VANNELLA
 (Sfacciata! Vi che ggioja le fa fare).
 DON PIETRO
 O ch’incanto, o ch’incanto!
 CARDELLA
1155Ma non parite proprio Pallatino?
 DON PIETRO
 Io sembro un amorino.
 VANNELLA
                                             (Oh bella cosa!)
 DON PIETRO
 Già pompeggia la rosa
 sul latte delle guancie, via è no spanto.
 O ch’incanto, o ch’incanto!
 
1160   Mon Dieù combien de sciarm!
 Sgiè donne des allarm
 o meme Cupidon.
 Tirì tiri nti nton.
 
 VANNELLA
 (Cchiù pazzo affè de chisto non se trova).
 CARDELLA
1165(Senz’autro io mme l’abbusco ste cient’ova).
 DON PIETRO
 Su tiene cca: mme voglio
 mettere la perucca. (Dà lo specchio a Cardella, e nfratanto Vannella se ride de Don Pietro, e le fa la baja da dereto, e Cardella se n’addona)
 CARDELLA
                                       (Si Don Pietro,
 Vannella è llà, e ve sta a ffa la baja).
 DON PIETRO
 Baja? Perché mi baja? (A Vannella)
 VANNELLA
                                             Che nne volite
1170da fatte mieje? Vuje site
 proibbeto co mmico. Scosta, scosta.
 DON PIETRO
 Scosta scosta a sta facce? Oh l’è ingiustizia.
 CARDELLA
 Vide quanta malizia! Essa faceva
 le gguattarelle; e ppo...
 DON PIETRO
                                            Perché facevi
1175le guattarelle?
 VANNELLA
                             A mme? Chesta cca propio
 nce ll’ha co mmico. Me sta sempe a ttuzzo,
 sempe a ddespietto, sempe a encia; e io...
 Mo nce vo... Che le faccio? Nzomma vedo,
 ca songo nata co la mala sciorte.
1180E llevamenne, o morte. (Chiagne)
 CARDELLA
                                              (Uh la nennella
 chiagne: sarvate mo).
 DON PIETRO
                                          Non pianger, bella:
 che fai di nuovo scolorirmi. Tergi,
 su tergi il pianto... o Dio!...
 CARDELLA
                                                   Sì sì facitele
 li scquase.
 DON PIETRO
                      Taci. (A Cardella) E ppe despietto tuio,
1185te, tieneme sto specchio. (A Vannella)
 CARDELLA
                                                A cchi?
 VANNELLA
                                                                Non serve.
 DON PIETRO
 Via su tenitemillo tutte doje.
 CARDELLA
 No.
 VANNELLA
           No.
 DON PIETRO
                     Mo a ccapo a ccapo
 lo ve tozzo ncoscienzia.
 Tenite.
 CARDELLA
                 Vi che ffreoma.
 VANNELLA
                                               Che ppacienzia! (Cardella e Vannella teneno lo specchio na mano pe d’una, e Don Pietro s’acconcia la perucca)
 
 SCENA XIX
 
 Marcaniello da la casa, po Carlo e li già ditte
 
 MARCANIELLO
1190O Ascanio forfantone!
 E ttutto chesto nc’è?
 CARLO
                                        Sono di nuovo,
 mio signor Marcaniello, io qua a servirla.
 Si compiacerà forse...
 MARCANIELLO
                                          Aspetta, aspetta. (addonannose de Don Pietro Vannella e Cardella)
 CARLO
 Attenda pure.
 MARCANIELLO
                             E mme? Che berneja è cchesta?
 DON PIETRO
1195M’aggiusto la pirucca.
 CARDELLA
                                           (Uh attiempo!)
 VANNELLA
                                                                         (Uh pesta!
 Sempe nce ncappo).
 MARCANIELLO
                                        E ttu, sia musso astritto,
 accossì ffuje ll’uommene?
 VANNELLA
                                                  Io le ffujo,
 ma chille po mm’arrivano.
 CARLO
                                                   Di grazia
 cos’ha in faccia Don Pietro? (A Marcaniello)
 MARCANIELLO
                                                      Che schefienzia
1200t’aje puosto nfacce?
 DON PIETRO
                                       È il solito
 mio color porporino.
 CARLO
                                        (Egli è belletto). (A Marcaniello)
 MARCANIELLO
 (Gnorsì).
 CARLO
                     Ma che pazzia!
 MARCANIELLO
                                                  Ciuccio, ciuccione,
 aje chess’autra virtù.
 DON PIETRO
                                         Ma, s’io son bello,
 non posso farmi brutto.
 MARCANIELLO
                                              Vaje ascianno
1205che io te vatta nn’ogne cunto? E tte. (Va pe dà na mazzata a Don Pietro, chillo scappa e isso cade)
 VANNELLA, CARDELLA A DUE
 O che mmallazzo!
 MARCANIELLO
                                   Ajemmè!
 DON PIETRO
 Cadde il meschin!
 CARLO
                                    Disgrazia! (Va pe sosere Marcaniello e Don Pietro lo trattene)
 DON PIETRO
                                                         Eh non s’incomodi:
 che farò io.
 CARLO
                        Che incomodo! È mio onore.
 DON PIETRO
 S’umilia troppo.
 CARLO
                                 Il mio dover conosco.
 DON PIETRO
1210Eh non sia...
 CARLO
                          Nol farò...
 MARCANIELLO
                                              Ah ca so mmuorto!
 Ajutateme.
 VANNELLA
                        E cchille stanno a ffare
 ceremonie nfra lloro.
 CARDELLA
                                         È ccoreosa! (A Vannella)
 Via sosimmolo nuje.
 VANNELLA
 E buoje, ch’io tocca n’ommo? Bella cosa!
 MARCANIELLO
1215Vi addove so mmattuto! Mme volite
 sosì da ccà co le mmalore voste?
 CARDELLA
 Non pozzo io sola.
 MARCANIELLO
                                   Chiamma chille llà. (Mosta dinto)
 CARDELLA
 Venì, venite cca.
 CARLO
                                 Mi fa commettere
 mala creanza. (Venneno duje uommene che auzano da terra Marcaniello)
 DON PIETRO
                             Alzate! (A chill’uommene)
 MARCANIELLO
                                            Ah! ah! li piede....
1220Ah! che ddolore! ah! ah! uh benaggia oje.
 VANNELLA
 Mo sarrà chella cosa,
 che non se pote dì.
 CARDELLA
                                     Che? La polagra?
 MARCANIELLO
 È la pesta v’afferra a ttutte doje.
 CARLO
 Potrete adagio, adagio
1225tornarne in casa.
 MARCANIELLO
                                  E cchi po dà no passo?
 Io so cciuncato.
 DON PIETRO
                               Io prenderovvi in braccia.
 MARCANIELLO
 Arrassate.
 CARLO
                      Ajutar vi pon costoro. (A li duje uommene)
 DON PIETRO
 Via portatelo a mmammara nocella.
 VANNELLA, CARDELLA A DUE
 
 Ora chesta sarrà na vista bella. (L’uommene pigliano mbraccia Marcaniello)
 MARCANIELLO
 
1230   Facite chiano.
 
 CARLO E DON PIETRO A DUE
 
 Si piano piano.
 
 DON PIETRO
 
 Con diligenza.
 
 CARLO
 
 Con civiltà.
 
 CARDELLA, VANNELLA A DUE
 
 Vi che spetale
1235se vo nzorà!
 
 MARCANIELLO
 
 Sì Carlo mio,
 po nce vedimmo,
 e pparlarimmo.
 
 CARLO
 
 Sì signor mio,
1240ne rivedremo,
 e parleremo.
 
 MARCANIELLO
 
 Chiano mannaggia...
 
 DON PIETRO
 
 Gente malvaggia,
 piano, o v’ammazzo.
 
 MARCANIELLO
 
1245Va va te lava,
 puorco sciù, sciù.
 
 DON PIETRO
 
 Il suo strapazzo,
 m’è sempre caro,
 caro mi fu.
 
 CARLO
 
1250Via, via finite,
 non ne sia più.
 
 VANNELLA E CARDELLA A DUE
 
 O bene mio,
 non rido cchiù. (Marcaniello trase a la casa soja portato mbraccio da chill’uommene, appriesso a isso traseno Don Pietro e Cardella; Vannella trase a la casa soja e Carlo se nne va pe strata)
 
 Scompe l’Atto Secunno