Lo frate ’nnamorato, libretto, Napoli, De Bejase, 1734

 SCENA XIII
 
 Ascanio
 
 ASCANIO
 Chesta pe mme se struje, piatà nne sento,
 né la pozzo ajutà. Ma li gguaje suoje
415affronte a li guaje mieje so rrose, e sciure.
 Che pena è cchella, o Dio!
 Che ppe Nina, e ppe Nena (ah chi lo ccrede?)
 sente sto core mio!
 Tanto ammo ll'una, quanto ll'autra, e ttanto
420da chesta amato so quanto da chella;
 né ssaccio addò spartireme,
 non saccio chi lassare,
 non saccio chi pigliare; e sto nfratanto
 pe ttutte doje mmiezo all'affanne. O sciorte!
425Pe ffarme ascì da stiento,
 remmedeà nce po schitto la morte.
 
    Ogne pena cchiù spiatata
 patarria
 st'arma affritta e annegrecata,
430si po avesse qua speranza
 de poterse conzolà.
 
    Ma ojemmè ca de conzuolo
 no nc'è lluoco, no nc'è bia,
 no nc'è mmuodo de sperà.