Il mondo della luna, libretto, Venezia, Fenzo, 1750

	Su via. (A Nina)
	ASCANIO
	(Vedite che rroina).
	NINA
	Or non parli? (A Nena)
	NENA
	A che taci? (A Nina)
	NINA
	Eh Nena.
	NENA
	Eh Nina.
	ASCANIO
1040	Ah! Sto parlare muzzo io già lo ntenno;
	fegnere dovarria de non sentire;
	ma, perché de morire
	già tengo ncapo, io voglio
	morì, crepà: e ddechiarà sto mbruoglio.
	LUGGREZIA
1045	(Che ssarrà bene mio?)
	NINA
	Parla.
	NENA
	Discorri.
	ASCANIO
	Nina, tu mme vuoje dire: Ascanio, io t’ammmo.
	Io t’ammo, Ascanio: mme vuoje dire Nena.
	Cara, io responno a tte, te voglio bene.
	Bella, te porto affetto, io a tte responno.
1050	Lassare ll’una, o ll’autra? Ah non sia maje:
	no mme fido, non pozzo; e ggià lo bedo,
	ch’amanno a ttutte doje,
	so a ttutte doje nfedele. Lo castico
	se mmereta sto core,
1055	che die recietto a lo cchiù strano ammore.
	Spetacciatelo addonca,
	facitene vennetta;
	datele lo castico, che le spetta.
	LUGGREZIA
	Tutto chesto avea ncuorpo sto forfante?
	NINA
1060	Nena, intendesti?
	NENA
	L’ascoltasti, Nina?
	NINA
	E fia ver ciò che dici? (Ad Ascanio)
	NENA
	E ’l ver ci narri? (Ad Ascanio)
	ASCANIO
	Eh, si fosse boscìa,
	accossì desperato io no starria.
	NINA
	Adunque io fra contenti
1065	esser debbo infelice?
	ASCANIO
	Ma che nce pozzo fa?
	NENA
	Son io fra gioje,
	e goder non mi lice?
	ASCANIO
	Ma che fare io nce pozzo?
	NINA
	Ah sorte!
	NENA
	Ah stelle!
	ASCANIO
	Che stelle, o sciorte! Vuje, vuje doje corpate.
	NINA
1070	Come?
	NENA
	Perché?
	ASCANIO
	Ca tutte doje mm’amate.
	NINA
	Nena, lascia d’amarlo.
	NENA
	Lascia d’amarlo, o Nina.
	ASCANIO
	Anze corpo io,
	che ddette esca a ddoje sciamme.
	NINA
	Amar puoi dunque
	me sola.
	ASCANIO
	E Nena?
	NENA
	Ama me sola adunque.
	ASCANIO
1075	E Nina? Oh Dio! Scompitela, e llevate
	da lo munno chi è ccausa de sto mmale:
	date, dateme morte.
	LUGGREZIA
	(Cchiù sentì no mme fido). (Trase)
	NINA
	Ah stelle!
	NENA
	Ah sorte!

	Se ’l foco mio t’infiamma,
1080	risolvi dal tuo petto
	scacciar ogni altro affetto.

	ASCANIO

	Ah! No lo ppozzo fa.

	NENA

	Se brugi alla mia fiamma,
	risolvi dal tuo cuore
1085	bandir ogni altro amore.

	ASCANIO

	Ah no, no nce penzà.

	NINA E NENA A DUE

	Ma questa è crudeltà.

	ASCANIO

	Ch’affanno è cchisto o Dio!
	Ah ca non pozzo cchiù.

	NINA E NENA A DUE

1090	Più barbaro, più rio
	di te giammai non fu.

	NINA

	Vedi, ch’io per te moro.

	NENA

	Vedi, ch’io son fedele.

	ASCANIO

	Si bene mme volite,
1095	ve preo, che mm’accredite.

	NINA

	Porgi al mio mal ristoro.

	NENA

	Non esser più crudele.

	A DUE

	Risolviti su su!

	ASCANIO

	So rresoluto sì,
1100	ma schitto de morì;
	dateme morte su. (Se ne traseno Nina e Nena)

	SCENA XV

	Ascanio, Luggrezia n’autra vota a lo barcone e Marcaniello da parte

	LUGGREZIA
	(L’amico ancora è cca).
	MARCANIELLO
	Io aggio scurzo
	Capo de Monte, accossì zuoppo e buono,
	né trovo lo si Carlo. E sta a bedere
1105	che schioppo co sti piede
	co ttanto trapazzarele.
	ASCANIO
	Io che ffaccio
	cchiù cca? Jammo a mmorire...
	LUGGREZZIA
	Oh galantommo;
	comme p’amare a mme ive trovanno
	tanta scuse, e raggire? Tu si cchillo,
1110	che nzorà no nte vuoje,
	eppo vuoje bene a ddoje?
	MARCANIELLO
	(Chesta che ddice?)
	LUGGREZIA
	Cride tu, ch’io non saccio quanto passe
	co sse romane? Io ntiso aggio lo ttutto.
	MARCANIELLO
	(Comme comme?)
	ASCANIO
	Luggrezia...
	LUGGREZIA
	Va frabbutto.
	(Luggrezia serra na fenesta nfacce ad Ascanio e ttrase, e cchillo resta ncantato)

	SCENA XVI

	Carlo, che bene a ttiempo quanno se ne trase Luggrezia, Ascanio e Marcaniello da parte.

	CARLO
1115	Che inciviltà! Una finestra in faccia
	ad un quasi fratello?
	MARCANIELLO
	(O bravo o bravo!)
	CARLO
	La mia sposa è inurbana! Io vi son schiavo,
	signor Ascanio: servo suo umilissimo.
	Non corrisponde? È fuor di sé. Bisogna
1120	compatir: grande fu la scortesia.
	ASCANIO
	Ah! ca chi mm’accedesse, io pagarria. (E se nne va desperato)

	SCENA XVII

	Marcaniello e Carlo

	CARLO
	Povero galantuom, dà quasi in furie!
	MARCANIELLO
	(Cca nce sarrà no mbruoglio del diavolo).
	CARLO
	Oh signor mio... Attempo: io v’ho a dir cose
1125	urgenti, e premurose.
	MARCANIELLO
	Io puro a uscia.
	CARLO
	Dica...
	MARCANIELLO
	Parlate...
	CARLO
	No, dica ella...
	MARCANIELLO
	E bia.
	CARLO
	Signor mio, se ho a sposar vostra figliuola,
	è d’uopo ch’ella (e vi fo chiari i patti)
	s’impari ben le cerimonie e i tratti.
	MARCANIELLO
1130	E cchesto mm’ha da dì?
	CARLO
	Questo: i principj
	ella non sa. (Finestre in faccia!)
	MARCANIELLO
	Uscia
	pazzea, parla de tratte, e zeremonie,
	e nnuje li matremmonie
	no le ffarrimmo.
	CARLO
	E come?
	MARCANIELLO
	Io voglio i ncoppa,
1135	pe ssapere da figliema no mbruoglio:
	mo mmo scenno, e pparlammo.
	CARLO
	Me ne dica
	or qualche cosa.
	MARCANIELLO
	Po te dico tutto.
	CARLO
	Oh Dio....
	MARCANIELLO
	Via mo.
	CARLO
	Ma questa è scortesia.
	MARCANIELLO
	Io mo so cco osseria.
	CARLO
	Questa è rozzezza.
	MARCANIELLO
1140	Mo nce vedimmo.
	CARLO
	Questa è inciviltà.
	MARCANIELLO
	E agge freoma, ch’io mo mmo so cca. (Trase a la casa)
	CARLO

	Mi palpita il core,
	non ho più in me calma;
	sospetto e timore
1145	mi affliggono l’alma.
	O Dio! Che sarà?

	Del ben, per cui vivo,
	vuol rendermi privo
	mia stella rubella?
1150	Saria crudeltà.

	SCENA XVIII

	Don Pietro co la facce conciata, ch’esce correnno co la perucca mmano, e Cardella co lo pejattiello de russo, e ppo Vannella da la casa

	DON PIETRO
	No nce vo autro via: sto no spavento.
	Lassame mette la perucca.
	CARDELLA
	None:
	nce vo cchiù rrusso a cchella via.
	DON PIETRO
	Sollecita
	su, ch’io son già stufato. (Vannella mette cchiù rrusso nfacce a Don Pietro)
	CARDELLA
1155	Ma si nce ha sconcecato
	a lo mmeglio lo gnore...
	VANNELLA
	(Maramene!
	che ffanno chilli lla? Sciù che bregogna!
	Se concia; e ppo mmiezo a la chiazza).
	DON PIETRO
	È llesto?
	CARDELLA

	È llesto. (Ll’aggio fatto comm’a mmaschera).
1160	Su mmerateve mo. (Don Pietro se mmira) Ah che ve pare?
	VANNELLA
	(Sfacciata! Vi che ggioja le fa fare).
	DON PIETRO
	O ch’incanto, o ch’incanto!
	CARDELLA
	Ma non parite proprio Pallatino?
	DON PIETRO
	Io sembro un amorino.
	VANNELLA
	(Oh bella cosa!)
	DON PIETRO
1165	Già pompeggia la rosa
	sul latte delle guancie, via è no spanto.
	O ch’incanto, o ch’incanto!

	Mon Dieù combien de sciarm!
	Sgiè donne des allarm
1170	O meme Cupidon.
	Tirì tiri nti nton.

	VANNELLA
	(Cchiù pazzo affè de chisto non se trova).
	CARDELLA
	(Senz’autro io mme l’abbusco ste cient’ova).
	DON PIETRO
	Su tiene cca: mme voglio
1175	mettere la perucca.
	(Dà lo specchio a Cardella, e nfratanto Vannella se ride de Don Pietro, e le fa la baja da dereto, e Cardella se n’addona)
	CARDELLA
	(Si Don Pietro,
	Vannella è llà, e ve sta a ffa la baja).
	DON PIETRO
	Baja? Perché mi baja? (A Vannella)
	VANNELLA
	Che nne volite
	da fatte mieie? Vuie site
	proibbeto co mmico. Scosta, scosta.
	DON PIETRO
1180	Scosta scosta a sta facce? Oh l’è ingiustizia.
	CARDELLA
	Vide quanta malizia! Essa faceva
	le gguattarelle; e ppo...
	DON PIETRO
	Perché facevi
	le guattarelle?
	VANNELLA
	A mme? Chesta cca propio
	nce ll’ha co mmico. Me sta sempe a ttuzzo,
1185	sempe a ddespietto, sempe a encia; e io...
	Mo nce vo... Che le faccio? Nzomma vedo,
	ca songo nata co la mala sciorte.
	E llevamenne, o morte. (Chiagne)
	CARDELLA
	(Uh la nennella
	chiagne; sarvate mo).
	DON PIETRO
	Non pianger bella:
1190	che fai di nuovo scolorirmi. Tergi,
	su tergi il pianto... o Dio!...
	CARDELLA
	Sì sì facitele
	li scquase.
	DON PIETRO
	Taci. (A Cardella) E ppe despietto tuio,
	te, tieneme sto specchio. (A Vannella)
	CARDELLA
	A cchi?
	VANNELLA
	Non serve.
	DON PIETRO
	Via su tenitemillo tutte doje.
	CARDELLA
1195	No.
	VANNELLA
	No.
	DON PIETRO
	Mo a ccapo a ccapo
	lo ve tozzo ncoscienzia.
	Tenite.
	CARDELLA
	Vi che ffreoma.
	VANNELLA
	Che ppacienzia!
	(Cardella e Vannella teneno lo specchio na mano pe d’una, e Don Pietro s’acconcia la perucca)

	SCENA XIX

	Marcaniello da la casa, po Carlo e li già ditte

	MARCANIELLO
	O Ascanio forfantone!
	E ttutto chesto nc’è?
	CARLO
	Sono di nuovo,
1200	mio signor Marcaniello, io qua a servirla.
	Si compiacerà forse...
	MARCANIELLO
	Aspetta, aspetta.
	(addonannose de Don Pietro Vannella e Cardella)
	CARLO
	Attenda pure.
	MARCANIELLO
	E mme? Che berneja è cchesta?
	DON PIETRO
	M’aggiusto la pirucca.
	CARDELLA
	(Uh attiempo!)
	VANNELLA
	(Uh pesta!
	Sempe nce ncappo).
	MARCANIELLO
	E ttu, sia musso astritto;
1205	accossì ffuje ll’uommene?
	VANNELLA
	Io le ffujo,
	ma chille po mm’arrivano.
	CARLO
	Di grazia
	cos’ha in faccia Don Pietro? (A Marcaniello)

	MARCANIELLO
	Che schefienzia
	t’aje puosto nfacce?
	DON PIETRO
	È il solito
	mio color porporino.
	CARLO
	(Egli è belletto). (A Marcaniello)
	MARCANIELLO
1210	(Gnorsì).
	CARLO
	Ma che pazzia!
	MARCANIELLO
	Ciuccio, ciuccione,
	aje chess’autra virtù?
	DON PIETRO
	Ma, s’io son bello,
	non posso farmi brutto.
	MARCANIELLO
	Vaje ascianno
	che io te vatta nn’ogne cunto? E tte.
	(Va pe dà na mazzata a Don Pietro, chillo scappa e isso cade)
	VANNELLA, CARDELLA A DUE
	O che mmallazzo!
	MARCANIELLO
	Aiemmè!
	DON PIETRO
1215	Cadde il meschin!
	CARLO
	Disgrazia! (Va pe sosere Marcaniello e Don Pietro lo trattene)
	DON PIETRO
	Eh non s’incomodi:
	che farò io.
	CARLO
	Che incomodo! È mio onore.
	DON PIETRO
	S’umilia troppo.
	CARLO
	Il mio dover conosco.
	DON PIETRO
	Eh non sia...
	CARLO
	Nol farò.
	MARCANIELLO
	Ah ca so mmuorto!
	Ajutateme.
	VANNELLA
	E cchille stanno a ffare
1220	ceremonie nfra lloro.
	CARDELLA
	È ccoreosa! (A Vannella)
	Via sosimmolo nuje.
	VANNELLA
	E buoje, ch’io tocca n’ommo? Bella cosa!
	MARCANIELLO
	Vi addove so mmattuto! Mme volite
	sosì da ccà co le mmalore voste?
	CARDELLA
1225	Non pozzo io sola.
	MARCANIELLO
	Chiamma chille llà. (Mosta dinto)
	CARDELLA
	Venì, venite cca.
	CARLO
	Mi fa commettere
	mala creanza. (Venneno duje uommene che auzano da terra Marcaniello)
	DON PIETRO
	Alzate! (A chill’uommene)
	MARCANIELLO
	Ah! Ah! li piede....
	Ah! che ddolore! Ah! Ah! Uh benaggia oje.
	VANNELLA
	Mo sarrà chella cosa,
1230	che non se pote dì.
	CARDELLA
	Che? La polagra?
	MARCANIELLO
	È la pesta v’afferra a ttutte doje.
	CARLO
	Potrete adagio, adagio
	tornarne in casa.
	MARCANIELLO
	E cchi po dà no passo?
	Io so cciuncato.
	DON PIETRO
	Io prenderovvi in braccia.
	MARCANIELLO
1235	Arrassate.
	CARLO
	Ajutar vi pon costoro. (A li duje uommene)
	DON PIETRO
	Via portatelo a mmammara nocella.
	VANNELLA, CARDELLA A DUE
	Ora chesta sarrà na vista bella.
	(L’uommene pigliano mbraccia Marcaniello)
	MARCANIELLO

	Facite chiano.

	CARLO E DON PIETRO A DUE

	Si piano piano.

	DON PIETRO

1240	Con diligenza.

	CARLO

	Con civiltà.

	CARDELLA, VANNELLA A DUE

	Vi che spetale
	se vo nzorà.

	MARCANIELLO

	Sì Carlo mio,
1245	po nce vedimmo,
	e pparlarimmo.

	CARLO

	Sì signor mio,
	ne rivedremo,
	e parleremo.

	MARCANIELLO

1250	Chiano mannaggia...

	DON PIETRO

	Gente malvaggia,
	piano, o v’ammazzo.

	MARCANIELLO

	Va va te lava,
	puorco sciù, sciù.

	DON PIETRO

1255	Il suo strapazzo,
	m’è sempre caro,
	caro mi fu.

	CARLO

	Via, via finite,
	non ne sia più.

	VANNELLA E CARDELLA A DUE

1260	O bene mio,
	non rido cchiù.
	(Marcaniello trase a la casa soja portato mbraccio da chill’uommene, appriesso a isso traseno Don Pietro e Cardella, Vannella trase a la casa soja, e Carlo se nne va pe strata)

	Scompe l’Atto Secunno


	ATTO TERZO

	SCENA PRIMMA

	Vannella a lo barcone

	VANNELLA
	Nnevina comme passa
	chillo povero viecchio. Lo scasato
	buono s’è stroppeato, e nce ave avuto
1265	corpa chillo pazzone de lo figlio.
	Sciù sciù parea no smostro! Ll’aggio ditto
	a le ssegnure, e ccontra de lo zio
	uh che te stanno a ffare:
	perché le bo co cchille annegrecare.

	SCENA II

	Cardella porzì a lo barcone, po Carlo pe strata e Don Pietro da la casa

	CARDELLA
1270	Pe ccavosa d’Ascanio mo sbattagliano
	la segnora, lo viecchio, e cchillo lammia
	de Don Pietro pe ttierzo. Uh uh che mbruoglio!
	VANNELLA
	Vecco chi mette affietto a cquanto faccio,
	e a cquanto dico. Parlà no nce voglio.
	CARLO
1275	Il signor Marcaniello
	cred’io che passi mal; fu la disgrazia
	molto per lui cattiva.
	VANNELLA
	Oh lo segnore.
	DON PIETRO
	Io son tutto furore. Ascanio indegno,
	mescridente sorella!
	CARLO
	Ecco Don Pietro.
	CARDELLA
1280	Uh chillo è sciso.
	VANNELLA
	E ancora sta conciato.
	Che pporcaria!
	DON PIETRO
	Ma ve’ ch’empio malnato!
	Mi corbellava, e steva a far del matto;
	e cco Nena m’ha fatto
	tenì na mula a ccurto bella e bona.
1285	Io lo truciderò... Ma qui sta lei? (S’addena de Carlo)
	CARLO
	Qui a servirla. Non scriva a mia mancanza,
	se d’inchinarla il debito non fei:
	io vi vidi pensoso, e disturbare
	i suoi pensier stimai mala creanza.
	DON PIETRO
1290	Oh lei l’abbruci.
	CARLO
	Or mio dovere adempio.
	DON PIETRO
	Non occorre.
	CARLO
	Son qui per confermarmi,
	per contestarmi... Più: per vincolarmi
	nella mia servitù.
	DON PIETRO
	Basta, basta, monsú.
	VANNELLA
	(Ah mo accommenzano).
	CARDELLA
1295	(Già se mettono nspesa).
	CARLO
	Ella è turbata:
	perché?
	DON PIETRO
	Son guai a cofani.
	CARLO
	Che guai?
	DON PIETRO
	Lei sappia...
	CARLO
	Oh scusi. Lei non mi direbbe
	pria come passa il signor padre?
	DON PIETRO
	Sì.
	Ei sta così così... Il piede alquanto...
1300	Basta: il mal non è grave.
	CARLO
	Or godo tanto!
	DON PIETRO
	Or sappia...
	CARLO
	Eh compatisca,
	se ’l primiero discorso io gl’interruppi.
	DON PIETRO
	Oh! Non importa.
	CARLO
	Fu l’affetto grande,
	c’ho al signor padre.
	DON PIETRO
	Oh! già si vede.
	CARLO
	Io penso
1305	che mi compatirà.
	DON PIETRO
	Oh! non ne parli.
	CARLO
	Mi farà quest’onore.
	DON PIETRO
	Oh! l’è padrone.
	CARLO
	Sarò da lei scusato.
	DON PIETRO
	O mmalora! M’ha lei assassinato.
	(Mo schierchio vi).
	VANNELLA
	(Chist’è lo cunto justo
1310	de stammatina).
	CARDELLA
	(Bene mio: che gusto!)
	CARLO
	Signor Don Pietro, ei par...
	DON PIETRO
	Sto flatizzante,
	per ciò non m’interrompa or, ch’io trascorro.
	CARLO
	Dica pur.
	DON PIETRO
	Nina, e Nena, e Nena, e Nina
	so invaghite d’Ascanio, e Ascanio toppa
1315	lo galantommo a ttutte doje: na botta
	dace a lo chirchio, e n’autra a lo tompagno.
	CARLO
	Ahi ch’ascolto?
	DON PIETRO
	Di più. Luggrezia poi
	sta co Ascanio incappata.
	CARLO
	Oh Dio!
	DON PIETRO
	Ma quella
	è da questo scacciata.
	VANNELLA
	(Ora sto mbruoglio
1320	no lo sapeva ancora).
	CARLO
	E ciò sapete
	voi ben?...
	DON PIETRO
	For bien: il padre
	ha scoperta l’imbroglia.\PCARLO
	Ei questo forse
	conferirmi dovea?
	DON PIETRO
	Sì questo.
	CARLO
	Adunque
	che far da noi si dè?
	DON PIETRO
1325	Che far? Ci gratterem noi ambi e tre.
	CARDELLA
	(Gh’è la meglio de tutte).
	CARLO
	Io penserei
	ben al rimedio.
	DON PIETRO
	E a qual?
	CARLO
	Per questa sera
	le nozze stringerei.
	DON PIETRO
	Bravo! Lei pensa
	come un demonio.
	CARLO
	Veda:
1330	la via più breve è questa.
	DON PIETRO
	Ogni doglia di testa
	così si leverebbe. Oh ben. Son pronto.
	CARLO
	Ma il signor Marcaniello?
	DON PIETRO
	Va a mio conto.
	CARLO
	Preparar mi poss’io dunque a i contenti?
	DON PIETRO
1335	Guì guì monseù, saremo al fin parenti. (S’abbracciano)
	CARDELLA
	(Cca se corre: avesammo la segnora).
	VANNELLA
	(A le ppatrune io voglio dì lo ttutto).
	A DUE
	(No guajo chisto po essere assaje brutto). (Traseno)
	CARLO

	Ai grande onore
1340	sarò inalzato
	d’imparentarmi
	con voi, signore;
	sarò beato,
	e invidiarmi
1345	ognun dovrà.

	Non mi credete?
	ah! m’offendete.
	Non so adulare,
	vi sto a narrare
1350	la verità.
	(E sse nne va facenno ceremonie nziemo co Don Pietro)

	SCENA III

	Nina, e ppo Nena da la casa

	NINA
	Io vo col zio finirla... egli andò via.
	Or sì sua tirannia è di tal sorte,
	che soffrir non si può.
	NENA
	Dov’è quel crudo,
	che concertar pensò la nostra morte?
	NINA
1355	Egli partì.
	NENA
	Per questa sera dunque
	già verranno ad effetto
	nozze si abominevoli?
	NINA
	Ah dispetto!
	Ma avrò spirito, avrò cor; stringerò il ferro,
	sì sì il ferro, e quel folle,
1360	ch’osa toccar mia destra,
	scorgerà, che sa far donna adirata.
	NENA
	Oprare anch’io saprò da disperata.
	NINA
	Nina sposa ad un vecchio? Ah no. Non sia.
	NENA
	Nena ad un matto sposa? Eh ch’è follia.
	NINA
1365	Non a lui, non ad altri
	l’amoroso desio
	volger saprò giammai.
	NENA
	Non ei, non altri mai
	potrà farmi svegliar nel petto amore.
	A DUE
1370	Sol d’Ascanio è il mio core.
	NINA
	Pensi ad Ascanio ancor?
	NENA
	Ancor Ascanio
	non obliasti?
	NINA
	E speri
	da lui mercé?
	NENA
	Da lui mercé tu attendi?
	NINA
	Né mercé, né pietà; ma acciocché vana
1375	sia tua speranza ancor, miei detti indeti.

	Suo caro, e dolce amore
	fida serbai nel core,
	e ’l serberò costante;
	né per avversa sorte
1380	tempre mai cangerò.

	Preda di morte ancora,
	ombra vagante ognora
	intorno a lui sarò.

	SCENA IV

	Nena

	NENA
	Ahi quanto è ver, che di costei l’amore
1385	la mia speranza uccide!
	Ma di me più infelice ove si vide?
	Amo, e desio d’esser riamata amando:
	così al mio male aver consuolo io penso.
	Pur son riamata, e pure
1390	consuol non ho, né trovo al mal compenso.

	Va solcando il mar d’amore
	or quest’alma innamorata.
	Dolce spira aura seconda,
	l’onda è in calma; e sventurata!
1395	Pur costretta è a naufragar.

	Ahi! l’esempio di sventura,
	la più strana, la più dura,
	solo in me si può trovar.

	SCENA V

	Ascanio

	ASCANIO
	A ddò vao? dove stongo?
1400	che rresorvo? che ffaccio? Ah! ca mme sento
	de chell’affritte into a le rrecchie ancora
	le buce, e lo lamiento: e cchisto affanno,
	e cchillo, che mme dà la passeone,
	provà mme fanno agnora
1405	de la morte li spaseme, e le ppene.
	Addo vao? dove stongo?
	che rresorvo, che ffaccio, affritto mene!

	Chi dà pace, chi dà carma
	a cchest’arma?
1410	Sento dire: no nc’è ppace,
	no nc’è ccarma cchiù ppe tte.

	SCENA VI

	Luggrezia da la casa, e lo stisso

	LUGGREZIA
	Oh tu cca staje? Te do na bella nova,
	ch’aggio mo propio ntesa. Pe stasera
	già co lo gnore Nina,
1415	e cco fratemo Nena ha da sposare,
	e io co lo si Carlo. Ah? che te pare?
	Non respunne? te mute de colore?
	ASCANIO
	Comme... che ddice?... O Dio!
	Già mme leva lo sciato lo dolore.
	LUGGREZIA
1420	No ll’aje sentuto? Torno a ddirlo?
	ASCANIO
	Ah none:
	ca troppo ll’aggio ntiso. E ssarrà bero?
	E ll’aggio da vedere, e dda soffrire?
	Ajemme... comme... mme sento io già mmorire.
	LUGGREZIA
	Nemmico de te stisso, e non te cure
1425	de provare st’affanno,
	pe d’essere co mme cossì teranno!

	SCENA VII

	Marcaniello da la casa co uno, che l’appoja, e cco n’auto, che pporta na seggia

	MARCANIELLO
	Portate cca sta seggia,
	ca voglio stare cca: co lo sta ncoppa,
	m’abbenceno li frate.
	LUGGREZIA
	(O Dio! lo gnore!)
	MARCANIELLO
1430	E tu lloco che ffaje co sso mercante?
	Comme...
	LUGGREZIA
	Io stea cca...
	MARCANIELLO
	Forfante...
	LUGGREZIA
	Sentite...
	MARCANIELLO
	Saglie ncoppa t’aggio ditto.
	LUGGREZIA
	O morte!
	MARCANIELLO
	Ah! sto accossì, tu aje raggione:
	ca, si no, te vorria...
	LUGGREZIA
	Ora fuje meglio
1435	pe na vota arrossire,
	che cciento mpalledire. Non accorre,
	gnore, che strepetate;
	mme potite scannare,
	ch’Ascanio da sto core non levate.

1440	Chillo è dde chisto pietto
	la gioja, e lo dellietto:
	chillo sta scritto cca.

	Io no mme curo niente
	de strazie e dde trommiente;
1445	a cchillo aggio da amà.

	SCENA VIII

	Marcaniello ed Ascanio

	MARCANIELLO
	Senta uscia comme parlano sperlito
	le ffegliole de mo! Ma va vattenne,
	ca t’agghiust’io. E ttu, sio galantommo,
	tutto sso scuoglio tiene ncuorpo?
	ASCANIO
	Gnore
1450	(ca chiammà te nce pozzo), giacché state
	ntiso de li guaie mieie, ve preo, ve suppreco
	autro non fa, che averenne piatate.
	MARCANIELLO