Il mondo della luna, libretto, Venezia, Fenzo, 1750

	Pietà? comme? Tu faie lo mpigno mio,
	e aie tanto ardire... uh ca te voglio accidere.
	ASCANIO
1455	Accediteme; ed io da mo la mano
	ve vaso, ca favore mme farrite.
	MARCANIELLO
	No nce vonno partite. Schitto penza
	a llevarte da capo
	ss’ammore pazzo.
	ASCANIO
	Ajemmè che stellettate!
	MARCANIELLO
1460	Comme? Che ddice?
	ASCANIO
	O Dio, gnore, piatate.
	Chello, che mmo mme cirche,
	s’io schitto penzo de lo ffa, già manco,
	già sudo friddo, e ggià so ttutto jelo;
	chisto è lo stato mio,
1465	chiste so li guaje mieie, cheste le ppene.
	MARCANIELLO
	Chisto sarrà deavolo pe mmene.
	ASCANIO

	Gnore mio, stongo io legato
	da catene accossì ccare,
	da catene accossi fforte,
1470	che la morte
	schitto rompere le ssa.

	Strascenato so ad amare:
	e a la forza, che mme sforza,
	io non pozzo contrastà.

	SCENA IX

	Marcaniello e ppo Don Pietro

	MARCANIELLO
1475	Chillo lla mm’ave fatto ntennerire.
	Per autro è ddigno de piatà. Sacc’io
	ll’essere ’nnammorato che bo dire.
	DON PIETRO
	Allegraman, allegraman, mon pere.
	Son io a lei furiere
1480	di belle nuove. Matrimonieremo
	per questa sera. Allegraman, mon per.
	MARCANIELLO
	O maro te! Io aggio gran paura,
	che pe ttutta stasera te ncatenano.
	DON PIETRO
	Che ffoss’io mattarello?
	MARCANIELLO
	E cco ssa facce
1485	parle de matremmonio?
	DON PIETRO
	Questa faccia
	ha fatto rivoltà Capo di Monte.
	MARCANIELLO
	Te lo ccreo: nn’aje avuto allucche, e fische.
	DON PIETRO
	Fischi? allucchi? È bugia: uomini e donne,
	per potermi mirare han fatto a punia:
1490	chi di qua, chi di là; io però, intrepido,
	passato me ne son, tisico e musico.
	MARCANIELLO
	(Via è gghiuto).
	DON PIETRO
	Or parliamo un po’ sul sodo.
	Conciasiacosacché da me già seppe
	il signor Carlo ogni ntrico; acciò si levino
1495	tanta dicomi e dissiti, sta sera
	stringer brama le nozze. Io so già lesto,
	è lesto lui, per esser lesto lei,
	bisognerà che i piedi vel permettano.
	MARCANIELLO
	Besognarrà lo cancaro te roseca.
	DON PIETRO
1500	Ma la podagra...
	MARCANIELLO
	Che podagra, bestia?
	Se site leste vuie, io so llestissemo.
	Videte... (S’auza, e non potendose mantenè mpiede va pe ccadere, e Don Pietro lo mantene)
	DON PIETRO
	Chià chià chià. Cascar volete. (Lo fa assettare)
	MARCANIELLO
	(Mannaggia!)
	DON PIETRO
	Fate il potta, e non potete.

	SCENA X

	Nina e Nena a lo barcone, e li ditte

	NINA
	Nena, lasciami andar.
	NENA
	Tu dunque...
	NINA
	Oh taci.
1505	Mira un po’ i nostri sposi.
	NENA
	O vaga coppia!
	DON PIETRO
	(Spirito, signor padre; ecco le spose).
	MARCANIELLO
	(Mme potesse sosì no pocorillo).
	DON PIETRO
	(Sforzateve).
	MARCANIELLO
	(Ah ca pozzo). (Se sose)

	DON PIETRO
	(Bravo bravo.
	Accostammonce lla chiano chianillo).
	NINA
1510	(Vengono a noi).
	NENA
	(Sen torneran confusi).
	DON PIETRO
	Finalmente placata ogni tempesta,
	già per nostro conforto, (A Nena)
	per questa sera arriveremo al porto. (A Nina)
	MARCANIELLO
	(Io mo cado). (a Don Pietro)
	DON PIETRO
	(Coraggio: mantenite). (A Marcaniello)
1515	Cred’io, ca no starrite
	più ammossate con noi. (A Nina e a Nena)
	MARCANIELLO
	(Io mo cado, deavolo).
	DON PIETRO
	(Mantenite mmalora).

	SCENA XI

	Cardella e Vannella da le ccase.

	CARDELLA
	(Uh... voglio sta a ssentì).
	VANNELLA
	(Cca stanno chisse?)
	NENA
1520	Questa sera voi dunque a me verrete
	per toccarmi la mano? (A Don Pietro)
	DON PIETRO
	Avrò l’onore.
	NINA
	E questa sera voi m’impalmerete. (A Marcaniello)
	Non è così?
	MARCANIELLO
	Mm’attoccarrà sta sciorte.
	(Io mo mme jetto).
	DON PIETRO
	(Ah cano! State forte).
	NENA
1525	Matto balordo, e non avrai rossore
	di venir con quel volto?
	NINA
	Vecchio schifoso, e non avrai vergogna
	di venir così infermo?
	NENA
	Mirate che sposin!
	NINA
	Guarda sposetto!
	NENA
1530	T’aspetto, vieni.
	NINA
	Vieni, ch’io t’aspetto.
	DON PIETRO
	Come, mio bene...
	NENA
	Va, attendi a imbellettarti.
	MARCANIELLO
	Donca osseria...
	NINA
	Va, pensa un po a curarti.

	SCENA XII

	Marcaniello, Don Pietro, Vannella e Cardella

	VANNELLA
	(Se ll’hanno ’ntesa bona).
	CARDELLA
	(Fuie bella la canzona).
	MARCANIELLO
	Aiuto, ajuto,
1535	ch’io già sconocchio.
	CARDELLA
	Chiano, bene mio.
	Sedite. (Accosta la seggia e Marcaniello s’assetta)
	DON PIETRO
	Sedie a me: sconocchio anch’io.
	VANNELLA
	Nce nn’è una cca bascio. (Trase dinto a la casa soia)

	CARDELLA
	Facite armo;
	si Don Piè; volite acqua?
	VANNELLA
	Te: assettateve. (Esce na seggia, e Don Pietro s’assetta)
	Comme fuie? Comm’è stato?
	DON PIETRO
1540	Inudita disgrazia!
	MARCANIELLO
	Io so arroienato.
	CARDELLA
	Via allegramente su, via, ca stasera
	s’ha da saglì a la zita.
	DON PIETRO
	Saliremo alle forche.
	VANNELLA
	(Chesta è bella).
	CARDELLA
	Comme no?... Perché ride, ne Vannella?
	VANNELLA
1545	Rido, ca sti segnure
	tu staje a ddelleggiare.
	CARDELLA
	Le buoje tu cosseare
	co sta resella.
	VANNELLA
	A mme? Vi che ttrammera!
	CARDELLA
	Io trammera? Aje cchiù ttramme, e cchiù malizie,
1550	che non so ffrunne a st’arvole!
	VANNELLA
	Uh chi parla! Chi è cchiena de trestizie.
	CARDELLA
	Ma non faccio la nzemprece.
	VANNELLA
	Ma io non so sfacciata.
	MARCANIELLO
	Che cos’è sta bajata? Via fenite.
	DON PIETRO
1555	No: serve a ristorarci. Dite dite.
	CARDELLA
	Tutta mm’è mmusse, e ppicce.
	VANNELLA
	Tutta mm’è smorfie, e sturce.
	CARDELLA
	Che ssinghe accisa.
	VANNELLA
	Mpesa.
	CARDELLA
	Strascenata.
	VANNELLA
	Scannata.
	CARDELLA
1560	Va a ppesta, schefenzosa.
	VANNELLA
	Va a la forca, moccosa.
	CARDELLA
	Zantraglia.
	VANNELLA
	Pettolella.
	CARDELLA
	Birbante.
	VANNELLA
	Lazzarella.
	CARDELLA
	Scalorcia.
	VANNELLA
	Brutta fatta.
	CARDELLA
1565	E ttu nne vuoje.
	VANNELLA
	E ttu vuoje, ch’io te vatta.
	(Vanno pe se da de mano, ma Don Pietro le sparte)
	MARCANIELLO
	O descenzo v’afferre.
	DON PIETRO
	Piano, piano.
	Parlate, e state sode co lle mmano.
	CARDELLA
	Aje gran fortuna.
	VANNELLA
	Non è ttiempo mone.
	MARCANIELLO
	Via saglietenne ncoppa. (A Cardella)
	DON PIETRO
	Via si plachi. (A Vannella)
	CARDELLA
1570	Va, ca nziemo sarrimmo.
	Si non te voglio... Ah! va nce vedarrimmo.
	VANNELLA

	Nce vedarrimmo gnorsì gnorsì.
	Non mme fa filo ss’ammenacciare.
	Co cchi te cride d’avè che ffare?
1575	Nce vedarrimmo, che d’è? che d’è?

	Ssì zerolille, ssì recciolille
	te le sdellanzo, te le spetaccio.
	Si tu nce ncappe, io non te faccio
	pe ppiezzo e ppiezzo cchiù bene avè

	SCENA XIII

	Don Pietro, Marcaniello e Cardella

	DON PIETRO
1580	Ha cacciato gran spirito!
	CARDELLA
	Ha raggione;
	nc’jerevo vuje, si no...
	MARCANIELLO
	Via via tu n’autra,
	ca si na mpertenente;
	non se sa che nne vuoje da chella llà.
	DON PIETRO
	Ll’hai presa a ttoreà. Non vi, ca quella
1585	è una figlia innocente?
	MARCANIELLO
	Si pproprio na mmardetta;
	e lo pparlà co ttico se nce perde.
	DON PIETRO
	Sei na diavoletta.\PMARCANIELLO
	Staje pe mmettere fuoco all’erva verde.
	CARDELLA

1590	Perché mme strellate?
	Perché ve nfadate
	co mmico accossì?
	Songo io mpertenente,
	chella è la nnozente!
1595	Va buono gnorsì.
	Avite raggione,
	besogna ngottà. (Se mette a chiagnere )

	Vi addò maje s’è bista
	de chella cchiù ttrista!
1600	E ddiceno pone...
	Uh uh mme vorria
	ncoscienzia mia
	mo tutta pesà.

	SCENA XIV

	Marcaniello e Don Pietro

	DON PIETRO
	L’è molto risentita, e biliosa
1605	quella ragazza.
	MARCANIELLO
	Chissi cca so llotene;
	parlammo a li guaje nuoste.
	Tu a cchelle llà l’aje ntese?
	DON PIETRO
	Ah! le spietate
	stanno molto ncocciate.
	MARCANIELLO
	E ttu ch’aje ditto
	de matremmonie, e dde stasera?
	DON PIETRO
	Ho detto
1610	quel che ha detto il sior Carlo.
	MARCANIELLO
	’Nzomma a sti matremmonie
	nce cantaie la cevettola.
	DON PIETRO
	Mi rido.
	O la promessa Carlo attennerà,
	o a duello da me si chiamerà.
1615	Ah, eh, ah, eh. Che crede? (Fa comme terasse de spata)
	MARCANIELLO
	Fa lo pazzo.
	Tu, ca staie frisco; già ll’aie ntesa a Nena.
	DON PIETRO
	E lei l’intese a Nina.
	MARCANIELLO
	Te la cantaie la vespera.
	DON PIETRO
	Vi cantò il calennario.
	MARCANIELLO
1620	Ora fu no cchiù cchiacchiare... Procura
	de trovà lo si Carlo. A la gabbella
	io mo vao chiano chiano, e llà v’aspetto.
	DON PIETRO
	Vi appoggerò.
	MARCANIELLO
	Gnernò. (Mo, che non serve,
	mme sento meglio. Ah ppiede tradeture!)
	DON PIETRO
1625	Badi a no ntroppicar.
	MARCANIELLO
	Bada tu a ttene,
	leva le schierchiarie.
	DON PIETRO
	Le leverò.
	MARCANIELLO
	Va t’annetta ssa facce.
	DON PIETRO
	Annetterò.
	MARCANIELLO
	Penza, ch’aje da nzorarte.
	DON PIETRO
	Penzerò.
	MARCANIELLO
	Statte sodo...
	DON PIETRO
	Starò, dirò, farò...
1630	padre, m’infracitò.
	MARCANIELLO
	Senta osseria!
	Fosse pazzo accossì chillo, che seria.

	Vi, ca nce nguaggio,
	ca tu la cunte;
	vi ca na vota
1635	pe ttute scunte;
	vi ca la rota
	vaie a botà.

	Nne sentarraggio
	pena io porzì;
1640	ma passarrà.
	E accossì,
	core mio bello,
	sta ncellevriello:
	pe tte nce va.

	DON PIETRO

1645	Do do re mi
	mi fa sol la.

	SCENA XV

	Vannella da la casa e Don Pietro

	DON PIETRO
	O scorbutico padre!
	VANNELLA
	Io non potette
	vennecarme co cchella; e mmo nne sento
	n’arraggia nzanetà.
	DON PIETRO
1650	E questa rabbia quanno passerà?
	VANNELLA
	Be? che ve pare? Songo state ngiurie,
	che mm’ha ditto Cardella?
	DON PIETRO
	Ah Cardella rubella,
	io ti castigherò. Però mi dia
1655	un morso adesso, o mia arrabbiata dea:
	che vo arrabbiare io puro.
	VANNELLA
	Sempe state
	vuie co le bburle.
	DON PIETRO
	No: brevi momenti
	meco t’assidi qui: di affari urgenti
	io ti debbo parlar. (Po vao trovanno
1660	lo si Carlo pescraje).
	VANNELLA
	(Vorria co cchisto
	sborearme no poco).
	DON PIETRO
	Ancor non siede?
	Seda, e a man dritta, ch’è ccosa d’assenza.
	VANNELLA
	Io faccio l’obbedienza. (S’assettano)
	DON PIETRO
	Bella, poichè del Fato
1665	il rigor mmalorato...
	VANNELLA
	Eh, nce vedesse
	quaccuno? Vuie sapite,
	ch’all’uommene io non pozzo sta vecina.
	DON PIETRO
	Non tema, o mia reina: no nc’è nullo,
	che nci pozza smicciar.
	VANNELLA
	Secoteggiate.
	DON PIETRO
1670	Lei parla tosco adesso?
	VANNELLA
	Un quanco io creggio
	dillettarmene.
	DON PIETRO
	Io godo, e secoteggio.
	Già per lunga stagione io smaniai,
	spasimai...
	VANNELLA
	Comme? Fuorze
	ebbe doglia di scianco?
	DON PIETRO
	Ah non sia mai!
1675	Spasimai per amor...
	VANNELLA
	Piano li corpi
	amore? Marramao!
	Io trascorrer d’amor non sentirebbe,
	ca mi smarizzarebbe.
	DON PIETRO
	Eh senta senta,
	ca sfizio nci avarrà.
	VANNELLA
	Dicete; e breve.
	DON PIETRO
1680	Come breve, se in queste cose forti
	bisogna essere eterno? Or seguitando
	la dolente rubrica; e, per concludere,
	(giaché l’impon) la tua patrona amai;
	or io... lo dico, o no?
	VANNELLA
	Sta titubante?
1685	E perché?
	DON PIETRO
	Lo dirò. Mentr’ella ingrata
	è meco, al suo mostaccio,
	io applicar mi vo con la creata.
	Si turba, si confonde?
	Ha perza la parola, e non risponde?
	VANNELLA
1690	Signor... Mannaggia!
	DON PIETRO
	Parli.
	VANNELLA
	Io non saprei.
	DON PIETRO
	Forze de’ mali miei
	non ha pietà?
	VANNELLA
	Vedete...
	E via signor, che voi un matto sete. (Se sose)

	DON PIETRO
	Ah crudel! Già lo vedo,
1695	che tu ancora per me hai il cor di smalto.
	VANNELLA
	Che smalto? Lei dicette... (Ah chisto proprio!)
	Tornate a dir...
	DON PIETRO
	Replicherò l’assalto.

	Io ti dissi, e a dirti torno:
	tu sarai la mia amorosa.

	VANNELLA

1700	Non sia mai, mi piglio scorno:
	chesta mo è na brutta cosa.

	DON PIETRO

	La sgrignosa più non fare.

	VANNELLA

	Mme facite vregognare.

	DON PIETRO

	Via madama, presto su.

	VANNELLA

1705	Scusi lei caro monzù.

	DON PIETRO

	Ah furbetta, viperetta!
	Tu vuoi farmi un po’ arraggià.

	VANNELLA

	Forfantello! Zingarello!
	Rossa rossa mi fai fà.

	DON PIETRO

1710	Via facciamo un po’ l’amore.

	VANNELLA

	E chi sape fa l’ammore?

	DON PIETRO

	Mo te mparo. S’io ti miro,
	e tu fammi un zennarello.

	VANNELLA

	Accossì?

	DON PIETRO

	O bravo, o bello!
1715	Tu sospira, s’io sospiro.

	VANNELLA

	Accossì?

	DON PIETRO

	Giusto accossì.
	Dico io poi: mi fai morire.

	VANNELLA

	Responn’io: mi fai sperire.

	DON PIETRO

	Basta, basta, tu si masta,
1720	e non serve cchiù a mparà.

	VANNELLA

	(So mparata da quant’ha).


	SCENA XVI

	Cardella da la casa e ppo Ascanio

	CARDELLA
	Io no nce pozzo sta: mme sento friere
	propio le mmano. Si no la straviso
	a cchella muzzecutola,
1725	no mm’accojeto. Uh te veccote Ascanio;
	e mme pare na statola.
	ASCANIO
	Puro torno a lo luoco,
	che cchiù assaje de lo ffuoco
	io dovarria foir: sì perché, o Dio!
1730	la causa è cca d’ogne ttormiento mio.
	CARDELLA
	Ommo da bene, schiavo.
	ASCANIO
	Oh tu cca staje?
	Che se fa? tu che ffaie? che ffa Luggrezia?
	CARDELLA
	(Pare storduto).

	SCENA XVII

	Don Pietro e li stisse

	DON PIETRO
	(Ecco il fellone).
	ASCANIO
	E Nena,
	e Nina, saje, che ffanno?
	DON PIETRO
	Ed ancor osa
1735	nominar Nina e Nena il labro audace?
	Mori.
	CARDELLA
	Ah fermate.
	ASCANIO
	Che bo dì sta cosa?
	(Don Pietro tira co la spata contra Ascanio e cchillo se defenne)
	CARDELLA
	Si Don Pie... bene mio! Aggente, aiuto. (Trase)
	DON PIETRO
	Difenditi se puoi.
	ASCANIO
	Ah so fferuto.
	(Ascanio sentennose feruto, tira contra a Don Pietro e cchillo se repara e sse fa arreto)
	DON PIETRO
	(O mmalora la cosa non va bona!)
1740	Chiano...
	ASCANIO
	Lassa sta spata. (Le guadagna la spata)
	DON PIETRO
	Amico hai vinto, io ti perdon perdona.
	(Lassa la spata e ffuje)

	SCENA XVIII

	Carlo e Ascanio

	CARLO
	Che miro! O Dio che fu?
	ASCANIO
	Lassame ire;
	so fferuto a lo vraccio.
	CARLO
	Oimè! Osserviamo.
	ASCANIO
	No: lassa.
	CARLO
	Ritiriamci
1745	qui dentro al mio cortil.
	ASCANIO
	Che ssarria stato
	si friddo nterra mm’avesse lassato. (Trase co Carlo)

	SCENA XIX

	Vannella a lo barcone, po Luggrezia a la strata, e ppo Marcaniello e Cardella

	VANNELLA
	Aggio ntiso cca bascio
	no remmore de spate,
	e Cardella strellà.
	LUGGREZIA
	Che nc’è, Vannella?
1750	Tu staje sbattuta?
	VANNELLA
	Sia Luggrezia mia,
	spate arrancate...
	LUGGREZIA
	Comme?
	MARCANIELLO
	Addò so gghiute?
	Cca no nc’è nnullo.
	CARDELLA
	Cca mo se teravano.
	MARCANIELLO
	O figlio pazzo, o arrojenato mene!
	LUGGREZIA
	Che ssarrà? Gnore...
	MARCANIELLO
	O figlia!
	VANNELLA
	Io voglio scennere.
	LUGGREZIA
1755	Cardè, che ccosa è stata?
	CARDELLA
	Don Pietro co la spata contr’Ascanio;
	ll’avarrà acciso.
	LUGGREZIA
	Ah negra me, mo moro!
	MARCANIELLO
	Non te partì, Cardella,
	appojame: io so mmuorto.
	CARDELLA
	(Nce voleva
1760	sto pisemo porzì).
	MARCANIELLO
	Sto figlio cano,
	ave da sconquassà la casa mia.
	Mannaggia quanno maje... Uh che dderria.

	SCENA XX

	Don Pietro e li stisse

	DON PIETRO
	Che so? dove m’inselvo? ove m’intano?
	MARCANIELLO
	Ah frabbuttone, tu ch’aje fatto?
	DON PIETRO
	O padre...
	LUGGREZIA
1765	Parla: che nn’è d’Ascanio?
	DON PIETRO
	Or varca l’onde,
	cred’io, del nero fiume.
	CARDELLA
	Stace frisco
	comme non fosse niente.
	MARCANIELLO
	Non vuoje dire,
	co Ascanio ch’aje avuto?
	DON PIETRO
	De’ suoi misfatti egli pagò il tributo.

1770	In singolar tenzone
	difesi mia raggione.
	Io vincitor restai,
	egli mi cadde al piè.

	La vita io gli donai,
1775	perché quel cano perro
	già guadagnò il mio ferro,
	ed allippar mi fé.

	MARCANIELLO
	Quanto va, ch’isso ave abbuscato all’ultemo.

	SCENA XXI ED URDEMA

	Carlo, Ascanio, Nena, Nina e Vannella da la casa; Marcaniello, Don Pietro, Luggrezia e Cardella

	CARLO
	Oh signor Marcaniello.
	LUGGREZIA
	Uh! vecco Ascanio.
	DON PIETRO
1780	Ascanio? Padre, addio...
	CARLO
	No no, fermate,
	signor Don Pietro: il male è nulla affatto.
	VANNELLA
	È no rascagno.
	CARLO
	E discoprir ne ha fatto
	un gran bene per noi. Mi dica in grazia,
	come si trova in suo potere Ascanio? (A Marcaniello)
	MARCANIELLO
1785	Perché lo bo sapè?
	CARLO
	La sua ferita
	volli osservar, e vidi al braccio un segno,
	che Lucio avea, quel piccolo figliuolo,
	che perdè il mio germano.
	MARCANIELLO
	Io quanno jette
	a Romma, a lo ttornà (creo, ca mo songo
1790	quase decessett’anne) quanno fuje
	a la Fajola, nterra lla lasciaje,
	e a Nnapole co mmico lo portaje.
	CARLO
	Ivi il perdè il german: salvando appena
	queste ragazze; allor che gli convenne
1795	fuggir da’ masnadieri.
	NINA
	Era ei d’etade
	circa a quattr’anni, il padre ne diceva.
	MARCANIELLO
	Gnorsì da lloco jeva.
	NENA
	Al collo appesa
	avea certa medaglia.
	MARCANIELLO
	Appunto.
	CARLO
	È desso.
	NENA, NINA A DUE
	O mio dolce fratello.
	ASCANIO
	A lo ppassato
1800	mo penzo. Io v’era FRATE, e ppe sta causa
	de tutte doje stea tanto NNAMMORATO.
	MARCANIELLO
	Nn’aggio gran gusto.
	LUGGREZIA
	Chi potea penzarelo?
	VANNELLA
	Lo munno comme va!
	CARDELLA
	Vedite cosa!
	DON PIETRO
	Veramente l’istoria è curiosa.
	ASCANIO
1805	Gnore (ch’accossì sempe te dderraggio),
	si affetto mm’aje portato, mo astregnimmolo
	co ffa na parentezza:
	Luggrezia sia la mia,
	e ffacimmo comprita l’allegrezza.
	MARCANIELLO
1810	Comme? E li matremmonie, ch’avimmo
	co zieto appuntate?
	ASCANIO
	E a bbuje mo pareno
	matremmonie da farle?
	CARLO
	Ah veramente
	così è!
	MARCANIELLO
	Ne? E sse faccia.
	LUGGREZIA
	O ch’allegrezza.
	NINA, NENA A DUE
	Colma or più che mai son di contentezza.
	CARDELLA
1815	Ma va buono.
	VANNELLA
	Mo è gghiusto.
	DON PIETRO
	Il dissi affè,
	che grattar ci dovrem noi ambi e tre.
	NINA, NENA, CARLO

	Su su a le gioje,
	nè mai di noje
	si parli più.

	TUTTE L’AUTRE

1820	Su de contiente
	schitto parlammo,
	nè a li trommiente
	penzammo cchiù.

	Scompe ll’Atto Terzo, e la Commeddeja.



	LO FRATE ’NNAMMORATO


	Commeddeja pe mmuseca de Jennarantonio Federico napolitano. Da rappresentarese a lo Triato de li Sciorentine lo Carnevale de chist’anno 1734.
	Addedecata a lo llostrissimo e accellentissimo segnor don Luise Sanseverino prencepe de Besegnano eccetera cavaliero de lo Tosone d’oro, primmo barone e Gran Justenziero perpetuo de lo Regno de Napole, e Grande de Spagna de primma classe eccetera.
	A Napole, a spese de Nicola De Bejase, e dda lo stisso se venneno sotta a la Posta.


	Llustrissimo, e accellentissemo segnore.
	Ascette a la luce ll’anno passato 1732 sta commeddeja e io mme pegliaje l’attrevemiento de dedecarela a vostra accellenza e avette la fortuna che cottanto buon animo l’avesse azzettata. Assennose fatto vedere co mmico tanto generoso, e lleberale de le grazeje soje: cosa veramente da perzonaggio destinto e quale fecato, comm’è l’accellenza vostra. Ora, mo che n’auta vota s’ha da rappresentare, aggio penzato de fa lo stisso pe dduje motive: primmo, azzocché avennose da restampare, e gghi attuorno, non perda la grolia, ch’avette ll’autra vota, de portà scritto nfronte lo nomme de vostra accellenza; e ssecunno, azzocché io renovasse, anze cchiù astregnesse le ccatene de la servetù mia appriesso a l’accelenza vostra, e mme mantenesse nchillo stato affortunato pe mme, nne lo quale nzi a mmo mme so mmantenuto, zoè d’essere de vostra accellenza schiavottiello ncatenato.

	Dommineco De Nicola


	A CHI LEGGE

	Sta commedeja se rappresentaje ll’anno 1732 nne lo stisso triato addò s’ha da rappresentare mo, e lo ssa agnuno; e cco cquanto gusto e ssodesfazeone di chi la ntese, puro agnuno lo ssa. Se torna a llebbrecare, perché da cchiù d’uno è stata cercata. Se spera che boglia avè la stessa fortuna, se non che cierte poch’arie, che bedarraje segnate co cchisto signo §, co l’accaseone, che l’è parzo de buono a lo masto de cappella de cagnarence la museca, secunno l’abbeletà de chi l’ha da cantare; e ppe ffarela no poco cchiù breve, s’è accortata no poco all’atto terzo. E statte buono.

	PERSONAGGE

	MARCANIELLO viecchio, patre de Luggrezia e dde Don Pietro
	(lo signore Jacovo D’Ambrosio)
	ASCANIO giovene nnammorato de Nena e dde Nina, che ppo se trova frate lloro co lo nomme de Lucio: cresciuto a la casa de Marcaniello.
	(la signora Teresa Passaglione)
	NENA e NINA sore carnale, nnammorate tutte doje d’Ascanio.
	(la signora Marianna Ferrante e la signora Maria Negri)
	LUGGREZIA figlia de Marcaniello, nnammorata d’Ascanio.
	(la signora Costanza Bajardo)
	CARLO zio de Nena e dde Nina, nnammorato de Luggrezia
	(lo signore Giammattista Ciriaci)
	VANNELLA crejata de Carlo
	(la signora Margarita Pozzi)
	CARDELLA crejata de Marcaniello
	(la signora Verginia Gasparrini)
	DON PIETRO giovene schirchio, figlio de Marcaniello
	(lo signore Geronemo Piano, vertovuso de la Cappella Rejale de Napole)

	La scena de la commeddeja è Capo de Monte.
	La museca è de lo segnore Giammattista Pergolese, masto de cappella napolitano.


	ATTO PRIMMO

	SCENA PRIMMA

	Vannella scopanno nnante a lo portone de la casa soja e Cardella coglienno sciure da le tteste ncoppa a lo barcone de la casa soja

	VANNELLA

	Passa Ninno da cca rrente,
	e mme fa lo zinnariello.
	Forfantone, malezejuso,
	tu co mmico vuoje pazzeà.

	CARDELLA

5	Io, pe ddare le martiello,
	no mme voto a ttenì mente.
	Forfantone, malezejuso,
	io te voglio fa caneà.

	Che te pare? vao bona?
	VANNELLA
10	Che? tu puro la saje sta canzona?
	CARDELLA
	Io puro; e mm’allecordo che na vota
	io la deceva, e nce abbuscaje da zia.
	VANNELLA
	Perché?
	CARDELLA
	Ca sta canzona
	mpara de fa l’ammore.
	VANNELLA
	Arrasso sia!
15	Affé no lo ssapea. Da mo nne nante
	no la derraggio cchiù.
	CARDELLA
	(Vedite cosa!
	Si manco fa l’ammore non sapesse).
	VANNELLA
	Comme dice Cardella?
	CARDELLA
	Niente, niente, Vannella. Accossì ppriesto
20	te miette a ttravaglià?
	VANNELLA
	Scopo cca nnante.
	CARDELLA?
	Sì: perché abbesognante
	mo de sta mpolezìa.
	VANNELLA
	Vuoie dì?
	CARDELLA
	Venne ll’autr’iere già lo figlio
	de lo segnore...
	VANNELLA
	Ll’aggio ntiso dicere.
25	E mme?
	CARDELLA
	Mo se farranno
	sti matremmonie.
	VANNELLA
	(E llesto).
	CARDELLA
	Stanno allegre
	mo ste romane, le ppatrune toje?
	VANNELLA
	Starranno allegre; e la patrona toja?
	CARDELLA
	Te lo ppuoje smacenare.
30	Vì, ca se tratta de se mmaretare.
	VANNELLA
	Ora io, si è pe mme, non saparria
	sto mmaretà che d’è! T’aje da vedere
	sempre n’ommo vecino.
	CARDELLA
	E cche te mozzeca?
	VANNELLA
	Leva le, che breogna! Io morarria.
	CARDELLA
35	Uh poverella (e ccridela) conforma
	dicemo tu, non te mmaretarraje.
	VANNELLA
	Io mmaretà? Sciù sciù! (che ffosse craje).
	CARDELLA
	Donca tu mo n’aje nullo nnammorato.
	VANNELLA
	Che? nnammorato? Guarda, satt’arrasso.
40	(Nn’aggio quarcuno).
	CARDELLA
	Aje visto Sautanasso?
	Io nn’aggio ciento.
	VANNELLA
	Ora parlammo d’autro.
	Ha ditto lo segnore
	ca chisto, ch’è benuto,
	è n’ommo tanto alliegro!
	CARDELLA
	È miezzo lammia.
	VANNELLA
45	Lo vorria vedè proprio.
	CARDELLA
	Oh justo justo,
	Veccolo lloco, e bene
	mmerannose a lo specchio.
	VANNELLA
	Uh maramene!
	CARDELLA
	Non te partì, ca nce avarraje gran gusto.

	SCENA II

	Don Pietro co no specchio mmano mmirannose e le ddette

	DON PIETRO

	Pupillette, fiammette d’amore,
50	per voi il core struggendo si va.
	Llarallà, llarallà, llarallera
	llarallerà, lallera, llallà. (Abballa)

	VANNELLA
	(È ccuriuso sa).
	DON PIETRO
	Stongo de genio
	stammatina frizzante e speretuso;
55	po fora de lo ssoleto
	sto bello de visage e scannaluso:
	nche mme vede la sposa