Lo frate ’nnamorato, libretto, Napoli, De Bejase, 1734

 SCENA VIII
 
 Marcaniello ed Ascanio
 
 MARCANIELLO
 Senta uscia comme parlano sperlito
 le ffegliole de mo! Ma va vattenne,
1440ca t'agghiust'io. E ttu, sio galantommo,
 tutto sso scuoglio tiene ncuorpo?
 ASCANIO
                                                             Gnore
 (ca chiammà te nce pozzo), giacché state
 ntiso de li guaje mieje, ve preo, ve suppreco
 autro non fa, che averenne piatate.
 MARCANIELLO
1445Pietà? comme? Tu faie lo mpigno mio,
 e aje tanto ardire... uh ca te voglio accidere.
 ASCANIO
 Accediteme; ed io da mo la mano
 ve vaso, ca favore mme farrite.
 MARCANIELLO
 No nce vonno partite. Schitto penza
1450a llevarte da capo
 ss'ammore pazzo.
 ASCANIO
                                   Ajemmè che stellettate!
 MARCANIELLO
 Comme? Che ddice?
 ASCANIO
                                         O Dio, gnore, pietate.
 Chello, che mmo mme cirche,
 s'io schitto penzo de lo ffa, già manco,
1455già sudo friddo, e ggià so ttutto jelo;
 chisto è lo stato mio,
 chiste so li guaje mieie, cheste le ppene.
 MARCANIELLO
 Chisto sarrà deaschence pe mmene.
 ASCANIO
 
    Vorria poterme sciogliere,
1460ma no lo ppozzo fa.
 Mme sento ll'arma spartere,
 sento mancà lo core. Ah chisto è affanno!
 
    Io mmiezo a ttanta guaje
 songo costritto a cchiagnere;
1465aggene tu piatà.
 Ca si piatà non n'aje, si no terranno.